KWESOKUDLA ngumqeqeshi weDowns, uMiguel Cardoso, kanti kwesobunxele ngabadlali bePirates.

IZITHOMBE NGABE: BACKPAGEPIX

Mfanafuthi Ndlovu

UMQEQESHI weMamelodi Sundowns, uMiguel Cardoso, uyibona seyikhanya bha indlela yale kilabhu ebheke ekunqobeni isicoco seligi amahlandla awu-9 kulandelana.

Lokhu ukuzwakalise emuva kokuba ezakhe zibuyele esicongweni se-log yeBetway Premiership, ziguqisa iPolokwane City ngo-1-0 ngoLwesithathu ebusuku eSeshego Stadium, eLimpopo.

Igoli leDowns liqotshelwe enethini nguMarcelo Allende ngomzuzu ka-65, okususe kabuhlungu i-Orlando Pirates esicongweni.

ISundowns izophinda ishukane nePolokwane emzuliswaneni wesibili koweBetway Premiership ngeSonto ngo-15h00 eLoftus Stadium, ePretoria.

Uma iDowns inqoba lo mdlalo, izokuba namaphuzu awu-65 okuzoyenza ivule igebe lamaphuzu awu-5 kwiPirates ehleli endaweni yesibili ngawu-59.

IPirates isiconsela amathe isicoco seligi, okuyinto eseyiphumele obala kaningi ngayo. Wonke amakilabhu asegijime imidlalo ewu-26 yeligi, asesalelwe ngemine ukugoqa isizini.

UCardoso utshele abezindaba ukuthi usefake umoya wokulwela ngenhlonipho ibheji lekilabhu kubadlali bakhe, njengoba sezibheke entanjeni.

NGUTEBOHO Mokoena weSundowns edidizelisa uThabang Matuludi wePolokwane.

IZITHOMBE NGABE: BACKPAGEPIX

Uthe ukholwa wukuthi lokhu kuzokwenza bakulwele ukunqoba yomine imidlalo ebasalele, ukuvikela isicoco sabo.

"Ngicabanga ukuthi abalandeli abazofika emdlalweni wethu nePolokwane ekhaya, bazobhema bakholwe.

"Nakuba ingelula iPolokwane, kodwa inhlanhla yethu wukuthi sobabili  besinomdlalo phakathi nesonto, akekho ozokuba nesikhathi sokuphumula (phakathi kwethu).

"Imidlalo esele yonke inzima. Okuhle wukuthi akekho umdlali ozithambisile esikwatini sami, bonke bafuna ukuba yingxenye yale midlalo esele," esho.

Kulo mdlalo iDowns ithole iphenathi, emuva kokudlaliswa kabi kukaKhulumani Ndamane, ethathwe nguLebo Mothiba, kodwa wayipha uLindokuhle Mathebula ongunozinti wePolokwane.

UCardoso uthe akazimisele ngokuphawula ngale phenathi, kwazise yizinto zonondweba ezingadingi yena njengomqeqeshi.

Uthe okuhle wukuthi bakwazile ukugcina indlela yokudlala, bangayinika intuba yokuphefumula iPolokwane.

Uthe bamchazile abadlali ngokugcina umgqigqo wokuqhubeka nerekhodi lokungehlulwa emidlalweni ewu-11 ilandelana. Nokho uthe isimo senkundla sibakhamile.

"Kodwa-ke sebeza esibayeni sethu manje, kumele sibakhombise ibhola lethu. Ngizolwela ukuthi abadlali bathole ukuphumula okwanele, ngaphambi kokuqala amalungiselelo omdlalo wePolokwane," esho.

Uthe okubi abhekene nakho wukuthi kusekhona abadlali abasalimele, kepha laba abakhona bakhombisa ukulwa enkundleni.

Uncome uNdamane ngokuba nomdlalo omuhle. Kuzokhumbuleka ukuthi lo mdlali wadala iphenathi seliyoshona, eyenza iDowns yabambana neStellenbosch koweligi muva nje.

Imidlalo yeBetway Premiership elandelayo imi kanje:-
NGESONTO
ELoftus: Mamelodi Sundowns vs Polokwane City 15h00.
NGOLWESIBILI
EBuffalo City: Chippa United vs Sekhukhune United 19h30.
ESeshego Stadium: Magesi vs Orbit College 19h30.
EDr Molemela Stadium: Siwelele vs Durban City 19h30.
E-Athlone: Stellenbosch vs Orlando Pirates 19h30.
NGOLWESITHATHU
ELoftus: Sundowns vs Kaizer Chiefs 19h30.
EMoses Mabhida: AmaZulu FC vs Golden Arrows 19h30.
EDr Molemela Stadium: Marumo Gallants vs TS Galaxy 19h30.
EMhlathuze Sports Complex: Richards Bay FC vs Polokwane City 19h30.