NGUPITSO Dladla obambe kwesokuqeqesha kwiDurban City.

ISITHOMBE NGABE: BACKPAGEPIX

Mfanafuthi Ndlovu

KUBUYA umdlali omqoka weDurban City ezogadulisana ne-Upington City koweLast 16 yeNedbank Cup ngoMgqibelo ngo-15h00 eMxolisi Dicky Jacobs Stadium, eNorthern Cape.

UPitso Dladla obambe isigqiki sokuqeqesha iDurban City, uthi uzokuya kulo mdlalo esehlome nangoJoslin Kamatuka waseNamibia, ongumgadli.

UKamatuka ubengakaze abonakale kulo nyaka ngenxa yokulimala ngasekupheleni konyaka odlule.

Lo mgadli wabamba iqhaza elikhulu nasekufakeni le kilabhu kwiBetway Premiership eseyidlala kuyona - isuka kwiMotsepe Foundation Championship (MFC).

UDladla uthi ulindele umdlalo onzima kwi-Upington. Uthi banqume ukushesha balibangise eNorthern Cape ukuyozijwayeza umoya wakhona, njengoba isimo sezulu sikhomba ukuthi lizokube likhipha umkhovu etsheni ngosuku lwalo mdlalo.

Uncome izikhulu zekilabhu ngokubahambisa ngebhanoyi kulo mdlalo, kungafani nangesikhathi besayibambe kwiMFC njengoba babebamba ibhasi uma beyodlala kulesiya sifundazwe.

NGU-GIVEMORE Khupe oyibamba esiswini kwi-Upington City (kwesobunxele) noJoslin Kamatuka weDBN City.

IZITHOMBE NGABE: BACKPAGEPIX

Uthi uyazi ukuthi bazofika i-Upington seyazi okuningi ngabo njengoba seyigijima nangoKatlego Maphathe ogijime iminyaka eminingi kwiDurban City, eyisitobha.

Uthi uyazi ukuthi lo mdlali uzocobelela uMusa Nyatama ongumqeqeshi we-Upington ngamakhongco abuthaka abo.

Nokho uthe uyazethemba ezakhe ukuthi zizokwazi ukuthola umphumela omuhle kulo mdlalo.

Mayelana nekusasa lakhe ekuqeqesheni njengoba eyibamba lomlolongi kwiDurban City, uthe usezinhlelweni zokuqedela iCaf A License njengoba esenayo iCaf B license.

 Uncome ukusebenzisana okuhle athe kuphakathi kwakhe nosomaqhinga wale kilabhu, u-Ernst Middendorp odabuka eGermany.

"Umuntu nomuntu uyawazi umsebenzi awujutshelwe ekilabhini, kakukho ukunyathelana. Sisebenza ngokukhulu ukubambisana," esho.