Kuvela okujabulisa abaqeqeshi beChiefs

NGU-ADEN McCarthy no-Inacio Miguel abayingxenye yodonga lwasemuva lweChiefs olungakaze lunikele ngegoli kule sizini.

ISITHOMBE NGABE: BACKPAGEPIX

Senzo Sokhela

I-KAIZER Chiefs izigqaja ngokungabi yisisefo esivuzisa amagoli kule sizini, okungenye yezinto ebezimise kabi le kilabhu ngesizini edlule.

Lokhu kuzwakaliswe nguKhalil Ben Youssef ongumsizi womqeqeshi weChiefs, uNasreddine Nabi ozohlala ebhentshini okokuqala kule sizini uma ezakhe sezibhekene neMamelodi Sundowns koweBetway Premiership ngoLwesithathu ngo-19h30 eFNB Stadium, eSoweto.

UNabi ubengekho emidlalweni emithathu edlule njengoba egoduke isigubhukane ukuya eTunisia, ukuyonakekela umkakhe owalimala kabi esemzini wabo olungiswayo.

Nakuba ebengekho uNabi, kodwa iChiefs yenza kahle kulezi zinsuku njengoba ishaya kwasani ephambi kwayo. Seyinqobe imidlalo emithathu ilandelana. Iya emdlalweni weDowns nje, iguqise iRichards Bay FC ngo-1-0 ngoLwesibili ebusuku eFNB Stadium, eGoli.

UYoussef uthi okuyikhona okubajabulisa kakhulu wukuthi kabawavuzisi amagoli ngale sizini, kwazise ngesizini edlule bebeseqhulwini emakilabhini abenikela ngamagoli.

YITHIMBA labaqeqeshi beChiefs. Kusuka kwesobunxele, yinhloko yabo uNasreddine Nabi; yisekela, uKhalil ben Youssef; ngumlolongi wonozinti, u-Ilyes Mzoughi noMadji Safi oyi-strength and conditioning coach.

ISITHOMBE NGABE: BACKPAGEPIX

Selokhu kuqale le sizini iChiefs kayikangenelwa yigoli.

"Sijabule ngodonga lwethu lwasemuva. Sikhulumile ngodaba lokuvuzisa amagoli, sazama ukulungisa.

"Kakukwazi ukuthi ikilabhu enkulu kangaka kube yiyona ehamba phambili ngokuvuzisa amagoli, yisimo esingamukelekile leso. Ngiyajabula ngoba kasinikeli ngamagoli kulokhu.

"Lokho kusinika ukuzethemba uma siya kunoma yimuphi umdlalo," kusho uYoussef.

Isiyonke imidlalo yeBetway Premiership ezokuba phakathi nesonto elizayo imi kanjena:-
NGOLWESIBILI
E-Orlando Stadium: Orlando Pirates vs Orbit College FC 19h30.
E-Old Peter Mokaba: Polokwane City vs Durban City 19h30.
EKing Zwelithini: Richards Bay vs Chippa United 19h30.
EDanie Craven: Stellenbosch FC vs Marumo Gallants 19h30.
EMbombela Stadium: TS Galaxy vs Siwelele 19h30.
NGOLWESITHATHU
EKing Zwelithini: Golden Arrows vs Magesi FC 19h30.
EPeter Mokaba: Sekhukhune United vs AmaZulu FC 19h30.
E-FNB Stadium: Kaizer Chiefs vs Mamelodi Sundowns 19h30.