OweBucs ubambe umoya ngabadlali abamqoka

Senzo Sokhela

UBAMBE umoya ngabadlali bakhe abamqoka umqeqeshi we-Orlando Pirates, u-Abdeslam Ouaddou, ezobhekana neMamelodi Sundowns emlenzeni wokuqala weSemi final yeMTN8 ngoMgqibelo ngo-15h00 e-Orlando Stadium, eSoweto.

U-Ouaddou ubhekene nengcindezi njengoba abalandeli beBucs bemsongela ngokuthi uma engahlulwa kulo mdlalo, kuyofanele azihambele yena kungaze kube yibona abamxosha kabuhlungu.

Bakhala ngokuthi usehlulwe kabili kulandelana emidlalweni yeBetway Premiership - njengoba eguqiswe yiSekhukhune United ngo-1-0, wahlulwa nayiMarumo Gallants ngo-2-1 ngoLwesibili ebusuku eDr Molemela Stadium, eBloemfontein.

NGABADLALI bePirates okukhona kubona uNkosinathi Sibisi (osekuqaleni kwesobunxele), noMakhehleni Makhaula (ongowesine kwabaphambili, uma usuka kwesobunxele), abanokuthinteka.

ISITHOMBE NGABE: BACKPAGEPIX

Ubhekene neSundowns ekhombisa ukubuyelwa yifomu kulezi zinsuku njengoba ibhudluze AmaZulu ngo-2-0 koweligi ngoLwesibili ebusuku eLoftus Versfeld Stadium, ePitoli.

U-Ouaddou uthe: "Konke kubukeka kuhamba kahle ekhempini, okwenzekile sesidlulile kukhona, sonke siwulangazelele lo mdlalo weSundowns. Sibambe umoya ngesimo sikaSibisi (uNkosinathi) noMakhaula (uMakhehleni), esilinde umbiko wodokotela ngabo.

"Ngaphandle kwabo, bonke abadlali basesimweni esihle, bawulindele lo mdlalo."

UMiguel Cardoso opheka iSundowns, uthe: "Kangikagculiseki ngezinga lebhola esilidlalayo, kuyabonakala ukuthi isizini isaqala, kasidlali neze kahle.

"Silindele impi kwiPirates, kodwa-ke sizobona ukuthi kuzokwenzekani kule milenze emibili ezayo."

* Komunye umdlalo weMTN8, iStellenbosch FC izobhekana neSekhukhune United emlenzeni wokuqala ngoMgqibelo ngo-18h00 eDanie Craven Stadium, eStellenbosch.