Ahlukene phakathi amakilabhu kuqala eyeSafa KZN ABC Motsepe League

YIZIKHULU zeSafa, uKwenzakwakhe Ngwenya noLydia Monyepao komunye umcimbi wokuqhathwa kwamakilabhu.

ISITHOMBE NGABE: BACKPAGEPIX

Mfanafuthi Ndlovu

AHLUKENE phakathi amakilabhu eSafa KwaZulu-Natal ABC Motsepe League ngokuqala kwemidlalo yeligi yalesi sigaba ekubeni ingakasongwa eyokuhlungela ukungena kwiLast 32 yeNedbank Cup.

ISafa esifundazweni ihlehlise imidlalo yeNedbank Cup obekumele ibe ngale mpelasonto, yafaka eyokuqala kweligi. Amakilabhu akhala ngokuthi atshelwe engalindele ngalesi sinqumo.

ISafa ithi imidlalo yama-semi final yokuhlungela iNedbank isizogijinywa ngoNovember.
Kuthiwa le midlalo ingase igijinyelwe oGwini Sports Complex, ePort Shepstone.

NGU-JAPHET Zwane ongumqeqeshi woMlazi Lions.

ISITHOMBE NGABE: BACKPAGEPIX

UKwenzakwakhe Ngwenya weSafa esifundazweni, utshele ILANGA Lempelasonto ukuthi isizathu sokuhlehlisa imidlalo yeNedbank Cup wukuthi basezinhlelweni zokuthi idlalelwe endaweni eyodwa.

Uthe konke sekumi ngomumo mayelana nokuqala imidlalo yeligi.

Phakathi kwamakilabhu esibhekwe ngabomvu isiqalo sawo kule sizini, kukhona uMlazi Lions FC ocijwa nguJaphet Zwane - wodumo lokugijima kwiManning Rangers, iMoroka Swallows, iFC Rostov yaseRussia namaZulu Fc, ukubala amakilabhu ambalwa - iDurban Pioneers egabe ngoMondli Miya owake wayibamba kwiReal Kings, kwiRichards Bay nakwiBizana Pondo Chiefs, uMzuvele Sikhosana okhuliswe yiKaizer Chiefs noTshepo Liphoko osuka kwiJDR Stars ebidlala kwiMotsepe Foundation Championship (MFC), egcine idayiselwe iLeicesterford City kule sizini njengoba isizinze eLimpopo.

Isiyonke imidlalo yokuvula isigaba seSafa KZN ABC Motsepe League imi kanje:-
NGOMGQIBELO
EScottburg Country Club: Umzinto United vs KwaDlangezwa Hellenic 15h00.
EKing Edward Stadium: UMvoti FC vs Goodfellas FC 15h00.
EPongola Sugar Mill: Njampela FC vs Tornado FC 15h00.
ERoad 1016: Summerfield Dynamos vs UKZN Impi FC 15h00.
EKing Zwelithini Stadium: UMlazi Lions vs ULundi United 15h00.
ENew Centre Stadium: KwaMashu Durban Knights vs FC Drakensberg 15h00.
EHarry Gwala: UMkhambathi FC vs Newcastle Warriors 15h00.
EGxushaneni: UMsinga United vs uMgungundlovu United 15h00.
Osizweni: Chess FC vs Newcastle All Stars 15h00.
ESaccharine Sports Grounds: Falcons FC vs eThekwini Coastal 15h00.
EWartburg: UMshwathi FC vs Ditlou FC 15h00.