I-ASA ithumele inqanawe yesikwati kwiWorld Athletics Relay

NGU-AKANI Simbine egadulisa amadoda.

Mzwamandla Zondi

IZOKUBE imelwe yinqanawe yesikwati iNingizimu Afrika kwiWorld Athletics Relay, ezoqala ngoMgqibelo isongwe ngeSonto eBotswana.

I-Athletics South Africa (ASA) ithumele abasubathi abasezingeni lomhlaba kulo mqhudelwano obhekwe ngabomvu emhlabeni.

Phakathi kwabasubathi ababhekiwe kulo mqhudelwano, kukhona u-Akani Simbine ozokube ebagadulisa kwi-100m.

Lo msubathi ubehlele imidlalo ye-track and field ebeyibizwa nge-Akani Simbine Classic ebingoLwesibili ePilditch, eGauteng.

USimbine ungukaputeni weqembu lesizwe. Iqembu lakuleli lizokube libagadulisa kwi-4x100m kwabesilisa nakwabesifazane, nakwi-4x400m kwabesilisa nakwabesifazane, nelixubile le-4x400m.

USimbine usanda kwenza isikhathi esingaphansi kwemizuzwana elishumi kwi-100m kwiSimbine Classic.

Omunye umsubathi obhekiwe, nguZakithi Nene osanda kuhlomula ngomklomelo weKZN Sportsman of the Year, kanti ngeledlule udle ubhedu kwi-400m eKenya.

 Nyakenye iNingizimu Afrika ibuye nezindondo ezimbili zegolide, neyodwa yethusi kuwo lo mqhudelwano.

Omunye umsubathi oseqenjini lakuleli osefomini, nguLeendert Koekemoer osanda kwenza irekhodi lamajuniya kwi-400m, eqopha u-44:94 egijima kwiSimbine Classic.

NGU-PRECIOUS Molepo ozokube eyingxenye yeqembu le-4x400m elixubile.

Lo msubathi uzokube ehambisana nobhuti abadala kwi-400m; okunguZakithi noWayde van Niekerk ophethe irekhodi lomhlaba kuleli banga, eliwu-43:03.

"Abagijimi esinabo eqenjini bagcwele ukuzethemba. Nginethemba lokuthi sizokwazi ukuvikela isicoco sethu kwazise iqembu lethu lihle kakhulu, futhi libumbene.

"Okuhle wukuthi siyabazi abantu esizokube sigijima nabo, okuzosisiza. Okubalulekile kithina wukuvikela isicoco sethu," kusho uSimbine.

Iqembu lakuleli le-4x100m: UCheswill Johnson, uSinesupho Dambile, uRetshididitswe Mlenga, uBradly Nkoana, u-Akani Simbine noTsebo Matsoso.

Ele-4x400m: UZakithi Nene, uLythe Pillay, uWayde van Niekerk, u-Udemo Okon, uGardeo Isaacs noLeendert Koekemoer.

Elabesifazane le-4x400m: UZeney Geldenhuys, uMarlie Viljoen, uChristi Loggenberg, uHannah van Niekerk, uJada van Staden noMiranda Coetzee.

Ele-4x400m elixubile: UMia De Beer, uRogail Joseph, uPrecious Molepo, uMthi Mthimkhulu, uDaniel Briel no-Antonie Nortje.