UKanu nethemba lokushubisa umbango weMFC

Mfanafuthi Ndlovu

UZA kahle umgqigqo kaVusumuzi "Kanu" Vilakazi (osesithombeni) osepheka iHighbury FC engenye yamakilabhu asempini yokunqoba iMotsepe Foundation Championship (MFC).

IHighbury ilahle amaphuzu okokuqala ngeledlule idliwa yiMagesi FC ngo-1-0 koweMFC, okwenze uVilakazi wafunga wagomela ukuthi uwadinga ephelele amaphuzu omdlalo wabo neGomora United ongoLwesihlanu ngo-15h00 eNelson Mandela Stadium. 

Uthi ufuna ukungasali emakilabhini ahleli phezulu. Uthi okubalulekile njengamanje, wukuba mdibi munye namakilabhu aphezulu kwi-log, ukuze athole ithuba elihle lokugadla uma sekubhekwe entanjeni.

"Isifiso sami esikhulu wukuqeda sihleli phezulu. Nokho njengoba isizini isephansi, kangifuni ukufakela abadlali bami ingcindezi. Umdlalo wethu neGomora yiwona ozosinika ukuphefumula kahle.

"Sifuna ukushoshela kwiMagesi FC, ingagcini ihamba yodwa phezulu ngamaphuzu amaningi," esho. 

Kubadlali ababhekiwe kwiHighbury FC nguWayde Jooste owake wayibamba kwi-Orlando Pirates FC, uSfiso Mbidana osuka kwiDurban City noGregory Damons obedlalela iChippa United ukubala nje abambalwa.

KwiGomora kukhona uSfiso Timba obekwiKaizer Chiefs, uSamkele Sihlali obedlalela iSekhukhune United noMpho Maoke obekwiTS Galaxy.

* Isiyonke imidlalo yeMFC engempelasonto imi kanje:-
NGOLWESIHLANU
ESolomon Mahlangu: Real Natives vs Venda FC 15h00.
ENelson Mandela Stadium: Highbury FC vs Gomora United 15h00.
NGOMGQIBELO
E-Athlone Stadium: Hope FC vs Orbit College 15h00.
ELucas Moripe: Leicesterford FC vs Midlands Wanderers 15h00.
E-NWU Fanie Du Toit: North West University vs Cape Town City 15h00.
KaNyamazane: The Bees vs Lerumo Lions 15h00.
EMxolisi Dicky Stadium: Upington City vs University of Pretoria 15h00.
NGESONTO
E-Old Peter Mokaba: Magesi FC vs Hungry Lions 15h00.