ITSHE limi ngothi kumqeqeshi weKaizer Chiefs ezokwamukela iRed Arrows emlenzeni wesibili womdlalo wokuhlungela ukungena esigabeni samaqoqo seCaf Confederation Cup ngoLwesihlanu ngo-18h00 eMoses Mabhida Stadium, eThekwini.

ILANGA Lempelasonto lihoshe ngemithombo yalo engashayi eceleni ukuthi abalandeli nengxenye yezikhulu zeChiefs kabaseneme ngoFernando Da Cruz waseFrance ocija iChiefs. Bakholwa wukuthi uyehluleka ukulawula isikwati sakhe.

Kuthiwa kungenzeka ungamfici umdlalo womkhaya ne-Orlando Pirates, ozokuba ngomhla ka-31 wale nyanga eFNB Stadium, eGoli. Umthombo uthe uma iChiefs ingakhishwa yiRed Arrows, kuyobe sekubhedile kulo mqeqeshi.

Usolwa ngokusonta abadlali, abafake ezindaweni okungezona ezabo, nokungabasebenzisi abafana noReeve Frosler noPaseko Mako.

USHIYE kwesokuba yisekela lomqeqeshi we-Orlando Pirates, wemukelwa kwesokulolonga iLamontville Golden Arrows uMandla “Mhloli” Ncikazi, owaqala ukugqama ekulolongeni, ecija bona Abafana Bes'thende.

UNcikazi - obesenesikhathi eside eyisekela kwiBucs - wemukelwe yile kilabhu kaMato Madlala ngoLwesine. Ushiye eziMnyama  esenqobe nazo izindebe eziwu-9. Kulezi zindebe kukhona eziwu-4 zeMTN iBucs ezinqobe amasizini amane elandelana.

USihlalo weBucs, u-Irvin Khoza, umbongile lo mqeqeshi, wamnika nezibusiso emsebenzini wakhe omusha.

 “Umnikelo wakhe kwi-Orlando Pirates uyaziwa.

"Siyasihlonipha isinqumo sakhe sokufuna amadlelo aluhlaza, futhi simfisela inhlanhla emsebenzini wakhe omusha,” kusho uKhoza.

EZIMNANDI ekhempini ye-Orlando Pirates kululama ngokugcwele u-Oswin Appollis odlala esiswini.

IBucs izobhekana ne-African Stars yaseNamibia emlenzeni wesibili weCaf Champions League ngoLwesihlanu ngo-20h00 e-Orlando Amstel Arena, eSoweto.

U-Appollis uke wangabonakala kwiBucs kula masonto adlule ngenxa yokulimala. Nokho umqeqeshi weBucs, u-Abdeslam Ouaddou, ukuqinisekisile ukuthi lo mdlali useluleme, akasazizwa izinhlungu.

Uthe ungumdlali oseqophelweni eliphezulu, futhi omqoka kwiBucs. Ufanise bonke abadlali beBucs namaFerrari anezinjini ezidinga ukunakekelwa ngokweqophelo eliphezulu.

Uthe ngeke bamjahe, bazomlinda aphole kahle. Emlenzeni wokuqala iBucs inqobe ngo-1-0 eBotswana.

USIYETHEMBA Sithebe (osesithombeni) - wodumo kumaZulu FC neKaizer Chiefs - uvumbuke kwiFlamengo FC egijima kwiSafa Hollywoodbet Super League, njengoba ezama ukuvusa ikusasa lakhe emuva kokubhinjelwa yizinto kwiKaizer Chiefs ayijoyina ngaphandle kwezibusiso zamaZulu FC ayevutha engabaselwe kuwona.

* U-Ashay Sewall owagcina ukudlala kwiRichards Bay FC, uthushuke kwiRiverside FC egijima kwiSafa KZN ABC Motsepe League ecijwa nguTom Mtambo.

Le kilabhu kayiyiqalanga kahle isizini njengoba ibhubha yisibhaxu, okungase kudalele uMtambo amazinyo abushelelezi kubaqashi bakhe.

UZITHWESE ijoka lokusiza iLerumo Lions yenyukele kwiBetway Premiership uMwape Musonda (35), ongumgadli waseZambia osuka kwiBlack Leopards egencwe yizembe ngesizini edlule kwiMotsepe Foundation Championship (MFC).

UMusonda uzovala isikhala esivuleke ezakhe zidayisa uNtuthuko Mlotshwa kwiChippa United. UMlotshwa wavelela ngokushaya amagoli ngesizini edlule kwiMFC benoRonaldo Van Neel, osegijima kwiGolden Arrows.

Bahlohla awu-13 ngokwahlukana.

* Imidlalo yeMFC engempelasonto imi kanje:-
NGOLWESIHLANU
ESolomon Mahlangu: Real Natives vs Highbury FC 15h30.
ESugar Ray Xulu: Midlands Wanderers vs Upington City 15h30.
E-Idas Valley: Hope FC vs The Bees 15h30.
E-Olympia Park: Orbit College vs Cape Town City 19h30.
NGOMGQIBELO
EMxolisi Dicky: Hungry Lions vs Venda FC 15h30.
ELucas Moripe: Leicesterford City vs Lerumo Lions 15h30.
ESeshego Stadium: Magesi FC vs Gomora United 15h30.
EFanie Du Toit: North West University vs University of Pretoria 15h30.