NGUTHABANI Zuke.

ISITHOMBE NGABE: BACKPAGEPIX

Mfanafuthi Ndlovu
 
ULANDELWA ngamabhadi uThabani Zuke (28), okuvele ukuthi ulimale esanda kusayina kwiSekhukhune United elolongwa nguPapi "Ginger" Zothwane.

ILANGA Lempelasonto lithole ukuthi uZuke uqale ukuzihlanganisa neSekhukhune emasontweni amabili adlule, ngenhloso yokuchaza uGinger.

Nokho kuthiwa useqede konke nale kilabhu esanda kwehlukana noCedric Kaze, osethathe umsebenzi wokulolonga iKagera Sugar FC, eTanzania, izintambo zabanjwa nguGinger obeyisekela.

UZuke ukhuliswe yiLamontville Golden Arrows, ahlale kuyona iminyaka eminingi, ngaphambi kokuthathwa yiRichards Bay FC ahlukane nayo ngesizini edlule.

Nokho leli phephandaba lithole ukuthi ngaphandle kokulimala kwalo mdlali, usalinde namaphepha amkhululayo kwiBay FC, bese eqala impilo entsha eGauteng.

Umthombo uthe: "UZuke ufike wafaka ukushisa ejimini, cishe ukuzwana kwakhe noZothwane kube nomthelela ekuthathweni yiSekhukhune.
Nokho ubenebhadi njengoba efike walimala.

"Ngikholwa wukuthi yinto engeke ithathe isikhathi eside eyokulimala kwakhe.
"Ngicabanga ukuthi uzokuba wusizo olukhulu kule kilabhu, kwazise uyakwazi ukuxhumanisa izitobha nabadlali basesiswini ngendlela esezingeni eliphezulu.

"Njengoba kukhona noSiphesihle Mkhize osuka eKZN kuzokwenza izinto zakhe zibe lula."

Sekuwumlando ukuthi uZuke wake wayibamba kwiThekwini Coastal College kaLindani "Mantayi" Shezi wodumo lokukhiqiza abadlali abanohlonzo; okubalwa kubona uSihle Nduli osegijima kwi-Orlando Pirates.

NGU-GABADINHO.

ISITHOMBE NGABE: BACKPAGEPIX

Kwenzeka lokhu nje, iBay ibuyise uGabadinho Mhango owalimala ngesizini edlule.

Kuthiwa uMhango useqalile ukuba yingxenye yeBay ngenhloso yokuyolekelela uNqaba Xulu ongalibheki ipali, selokhu kuqale isizini.