NGUNDUMISO Ngiba weWanderers.

ISITHOMBE NGABE: BACKPAGEPIX

Mfanafuthi Ndlovu
 
IBALISA ngokushoda ngomgadli ongalibheki ipali iMidlands Wanderers ezoshukana neNorth West University koweMotsepe Foundation Championship (MFC) ngoMgqibelo ngo-15h00 eSugar Ray Xulu Stadium, eClermont.

UNdumiso Ngiba ogijima kwiWanderers, utshele leli phephandaba ukuthi inkinga enkulu ababhekene nayo, wukuntula umgadli ongacucuzi phambi kwamapali, ozokwazi ukuqedela wonke amathuba abawakhayo emidlalweni.

Uthi yize bewakha amathuba, kepha baphoxwa wukuthi kabawabhakuzisi enethini, okuyinkinga athi kufanele bayilungise ngokushesha emidlalweni ezayo.

"Kubalulekile ukuthi emdlalweni wethu neNWU siwathathe wonke amaphuzu asetafuleni njengoba sisekhaya.

"Wukuthi-ke sizokube sibhekene nekilabhu entsha, esanda kungena kwiMFC, elwela ukuqinisa indawo yayo kulesi sigaba," esho.

NGUSANELE Radebe.

ISITHOMBE NGABE: BACKPAGEPIX

Unxuse abalandeli ukufika ngobuningi kulo mdlalo ukuzobafaka ugqozi.

"Ngiyethemba ukuthi abalandeli bazoqhubeka nokusixhasa ngamandla. Siyethembisa ukuthi sizobakhombisa ibhola elihle," esho.

Kubadlali ababhekiwe ukutholela iMidlands amaphuzu agcwele kukhona uSmiso Gazu oshoshela mawala esuka emuva, uSanele Radebe noSonwabo Khumalo ukubala nje abambalwa.

* Isiyonke imidlalo yeMFC ezokuba ngempelasonto imi kanje:-
NGOMGQIBELO
EMalamulele Stadium: Gomora United vs Leicesterford City 15h00.
EThohoyandou Stadium: Venda FC vs Upington City 15h00.
EMxolisi Dicky Stadium: Hungry Lions vs The Bees 15h00.
E-University of Johannesburg: Lerumo Lions vs Real Natives 15h00.
ESugar Ray Xulu: Midlands Wanderers vs North West University 15h00.
ETuks Stadium: University of Pretoria vs Orbit College 15h00.
NGESONTO
ENelson Mandela Stadium: Highbury FC vs Magesi FC 15h00.
E-Athlone Stadium: Hope FC vs Cape Town City 15h00.