Ezifingqiwe

KUSUKA kwesobunxele nguMiguel Cardoso ololonga iDowns, ngu-Abdeslam Ouaddou ocija iBucs noFernando Da Cruz oqeqesha iChiefs.

ISITHOMBE NGABE: BACKPAGEPIX

BAYOZE bathi tshiyo tshiyo abadlali bezinkunzi zePremier Soccer League (PSL) njengoba zidlala emiqhudelwaneni emqoka yase-Afrika, futhi zihambe amabanga amade emidlalweni yemikhumulajezi yaseNingizimu Afrika, ekubeni abanye babuye babe wumgogodla weBafana Bafana.

Umqeqeshi weMamelodi Sundowns uMiguel Cardoso, owe-Orlando Pirates u-Abdeslam Ouaddou, noFernando Da Cruz weKaizer Chiefs, basho ngazwi linye bathi bathwele kanzima abadlali babo njengoba imidlalo yala makilabhu icinene.

IDowns nePirates basuke kowamanqamu weMTN8 ngoMgqibelo eThekwini, bagijima eyeligi ngokwahlukana ngoLwesibili, kanti ngempelasonto ziyasha kwiCaf Champions League.

IDowns izodlala neWiliete SC yase-Angola ngoMgqibelo ngo-15h00 ekuhambeni, kuthi iBucs ishukane ne-African Stars yaseNamibia ngawo uMgqibelo ngo-15h00 eBotswana.

IChiefs izogadulisana neRed Arrows yaseZambia koweCaf Confederation Cup ngoMgqibelo ngo-15h00 ekuhambeni kuthi iDurban City igadulisane ne-AS Port Louis yaseMauritius ngeSonto ngo-15h00 eMoses Mabhida Stadium, eThekwini.

Imilenze yesibili izokuba ngelizayo. Emuva kwemilenze yesibili, la makilabhu azodlala kwiLast 16 yeCarling Knockout. 

ABATHANDI beKaizer Chiefs baKwaZulu-Natal bazozitika ngomdlalo wale kilabhu neRed Arrows yaseZambia, womlenze wesibili wokuhlungela ukungena esigabeni samaqoqo seCaf Confederation Cup ozokuba ngoLwesihlanu lomhla ka-23 ku-October ngo-18h00 eMoses Mabhida Stadium.

Amathikithi okubuka lo mdlalo abiza u-R80, kanti aseqalile ukudayiswa ezitolo zakwaShoprite/ Checkers ezweni lonke.

Kwenzeka lokhu nje, asedayiswe wonke amathikithi okubuka iChiefs igadulisana ne-Orlando Pirates koweBetway Premiership ozokuba ngoMgqibelo womhla ka-31 wale nyanga ngo-15h00, eFNB Stadium, eSoweto.

NGUSIPHOSETHU Ndlabi weMilford FC (okwesobunxele) noNqobeko Dlamini we-Arrows, okulindeleke ukuba basize amakilabhu abo ngokwehlukana, uma esebhekene koweligi.

ISITHOMBE NGABE: BACKPAGEPIX

IPHEKWA ngomhluzi wenye kubathandi bakanobhutshuzwayo baseThekwini namaphethelo ngemidlalo yomkhaya, abazitika ngayo kulandelana.

Kungakapholi maseko AmaZulu FC eguqise iDurban City ngo-2-1 koweBetway Premiership ngoLwesibili ebusuku eChatsworth Stadium, iLamontville Golden Arrows izomukela iMilford FC komunye umdlalo womkhaya baKwaZulu-Natal, ozokuba ngoMgqibelo ngo-15h30 eKing Zwelithini Stadium, eMlazi.

Nakuba iMilford ingomakoti esigabeni esikhulu, kodwa seyikhombisile ukuthi kayivakashile njengoba yabhabhadisa iRichards Bay FC ngo-5-1 kowomkhaya baseMhlathuze, maqede iBay FC yaxosha umlolongi, uRonnie Gabriel.

Kulindeleke ukuba kushube nakowe-Arrows neMilford.

Imidlalo engempelasonto imi kanje:-
* NGOMGQIBELO
EBuffalo City Stadium: Chippa United vs Kruger United 15h30.
EKing Zwelithini: Lamontville Golden Arrows vs Milford FC 15h30.
EPeter Mokaba Stadium: Sekhukhune United vs Marumo Gallants 18h00.
NGESONTO
EFree State Stadium: Siwelele vs Polokwane City 15h30.