NGU-LUKE Baartman weChiefs.

ISITHOMBE NGABE: BACKPAGEPIX

Senzo Sokhela

UZIFELA ngokuba ngumgadli umdlali weKaizer Chiefs, okusabhekwe lukhulu kuyena njengoba enokuboshelwa ezindaweni ezahlukene.

ULuke Baartman (20), ujoyine iChiefs ngesizini edlule esuka kwiCape Town Spurs ebigengcwe yizembe kwiMotsepe Foundation Championship.
Ngesizini edlule udonse kanzima ukuthola ijezi; udlale imidlalo ewu-7, kuhlanganiswa yonke imiqhudelwano.

Ngale sizini isikimu ngesakhe ngaphansi komqeqeshi omusha, uFernando Da Cruz.
Usegijime imidlalo ewu-8, washaya igoli elilodwa.

UDa Cruz umdlalisa ezindaweni ezahlukene njengoba emubophela ezinhlangothini phambili, yingemuva komgadli kokunye abuye abe ngumgadli.

NGU-BAARTMAN (ophakathi), ephahlwe ngozakwabo, u-Asanele Velebayi (okwesobunxele) no-Etiosa Ighodaro.

ISITHOMBE NGABE: BACKPAGEPIX

UBaartman uthi kumjabulisa ngendlela eyisimanga ukuthi isikimu uyasithola ngale sizini.
Uthi uzokulwela ukuthi isimo sakhe sihlale sinjena.

"Ngicabanga ukuthi le sizini isangiphethe kahle kwazise ngisayidlale yonke imidlalo eligini njengamanje.

"Okwami nje wukuthi ngisebenze kanzima ukuze ngiqhubeke nokudlala.
"Uma ungadlali ngeke ulithole ithuba lokubizwa eqenjini lesizwe njengoba ngiseqenjini lika-U/23.

"Ngisuka eqenjini ebelihleleke ngokweqophelo eliphezulu, iCape Town Spurs, kanti nesikhungo sayo esithuthukisa ibhola, sikwelinye izinga.

"Kodwa-ke mina indawo engiyithandayo nengiyiqonda kangcono, yiphambili. Ngithanda ukuba ngumgadli, kukumina ukuhlohla amagoli.

"Kodwa-ke lapho umqeqeshi engifaka khona, ngizodlala, futhi ngiwenze umsebenzi.

"Ngiyamubonga kakhulu umqeqeshi uDa Cruz ngokunginika ithuba, nami ngizomubonga ngokumsebenzela enkundleni," esho.