18 | Ezemidlalo
Friday, 09 October 2026
NGUTAPELO Xoki.
ISITHOMBE NGABE: BACKPAGEPIX
Ubonga ukwesekwa yiPirates kukubi
UXoki ushaya ibuya emuva konyaka engabonakali enkundleni ngenxa yengozi yemoto
Senzo Sokhela
UBONGA ukwesekwa yi-Orlando Pirates ngesikhathi ebhekene nobunzima uTapelo Xoki odlala emuva kule kilabhu ezogadulisana neMamelodi Sundowns kowamanqamu weMTN8 ngoMgqibelo ngo-18h00 eMoses Mabhida Stadium, eThekwini.
UXoki uke wahlala isizini yonke engadlali emuva kokuba babasengozi yemoto nomqeqeshi weBucs, u-Abdeslam Ouaddou, nabanye abasebenza kule kilabhu. Lo mdlali useluleme ngokugcwele.
"Ngiyayibonga kakhulu ikilabhu ngokungeseka ngesikhathi ngibhekene nobunzima, ngilimele.
"Ngibonga nethimba lodokotela elikwenze konke ukuze ngilulame kahle, ngiphinde ngidlale. Bangeluleke nangokomqondo ngoba ukuhlala isikhathi esingaphezulu konyaka ulimele, kakuyona into encane.
"Ngijabule ukubuya ngizosiza ikilabhu. Empeleni sifuna ukuqhubeka nokwandisa umlando omuhle wale kilabhu," esho.
NGUXOKI noBohlale Ngwato.
ISITHOMBE NGABE: BACKPAGEPIX
Uthi bengabadlali, bawulindele lo mdlalo weSundowns.
"Sonke siwulangazelele lo mdlalo, nasejimini uyabona ukuthi sonke sifuna ukuba yingxenye yawo.
"Kodwa-ke okumqoka wukweluleka laba badlali abasebancane ngobumqoka bokunqoba lo mdlalo, ngoba nami ngidodiswe ngimncane ngabadlali abanjengoMbulelo Mabizela noRobyn Johannes.
"Kufanele sikhohlwe ngesikwenze ngonyaka odlule, sibhekane nalo mdlalo ophambi kwethu.
"Kasifikanga lapho esikhona ngephutha, kodwa kumqoka ukuthi sizihloniphe izimbangi zethu, besesidlala ibhola lethu ngokuzethemba.
"Uma senze njalo, ngikholwa wukuthi sizowunqoba lo mdlalo," esho.
Ilanga Lempelasonto