NGUTHAPELO Morena (okwesokudla) enozakwabo, uTeboho Mokoena.

ISITHOMBE NGABE: BACKPAGEPIX

Senzo Sokhela
 
UWUFANISA nowanqamu umdlalo wabo weCaf Champions League uThapelo Morena, ongumdlali weMamelodi Sundowns, osekuneminyaka edlala kule kilabhu.

IDowns izogadulisana neWiliete SC yase-Angola emlenzeni wesibili koweCaf Champions League ngoLwesihlanu ngo-20h00 eLoftus Stadium, ePitoli.

Emlenzeni wokuqala, la makilabhu abambane ngo-0-0, ekuhambeni. UMorena - odlala emuva kwiDowns - uthi kufanele bawunqobe kumnyama kubomvu lo mdlalo, kabakwazi ukuphoxa abalandeli babo.

Phela iSundowns yiyona eyizingqwele zalesi sicoco esinqobe ngesizini edlule, iqumba phansi i-AS FAR Rabat yaseMorocco ngo-2-1 uma sekuhlanganiswa imiphumela yayo yomibili imilenze yowamanqamu.

"Lo mdlalo ufana nowamanqamu kithina kwazise kasizange sinqobe emlenzeni wokuqala. Isimo sivuna bona ngoba bahambile.

"Ukushaya kwabo igoli ekuhambeni kuzosifakela ingcindezi. Njengoba siya kulo mdlalo nje, kufanele senze isiqiniseko sokuthi siyawavalela amathuba esiwatholayo.

"Into esibulele emzuliswaneni wokuqala wukungawasebenzisi amathuba esiwatholile. Kodwa-ke ngingakusho ngingesabi ukuthi sizowunqoba lo mdlalo, ngeke silenze iphutha ngalapho.

"Hhayi ngoba ngizithatha kalula izitha - impela ziyiqembu elihle - kodwa kithina yonke imidlalo isifana nowamanqamu, ngoba sihlose ukuthatha kwasani ngale sizini. Sidonswe ngendlebe ukuthi zifuneka zonke izinkomishi esizozidlalela," esho.

NGU-RONALD Kejitjere we-African Stars ecishe egunda uSimphiwe Masilela weBucs.

ISITHOMBE NGABE: BACKPAGEPIX

* Komunye umdlalo weChampions League, i-Orlando Pirates izodudulana ne-African Stars yaseNamibia emlenzeni wesibili wokuhlunga walo mqhudelwano ngoLwesihlanu ngo-20h00 e-Orlando Amstel Arena, eSoweto.

IBucs isiwufakile umlenze owodwa esigabeni samaqoqo njengoba inqobe ngo-1-0 emlenzeni wokuqala obungeledlule eBotswana.

Inqobe ngegoli likaTshepang Moremi. U-Abdeslam Ouaddou ongumqeqeshi weBucs, uthi nakuba kubahambele kahle ngeledlule, kodwa umsebenzi kawukapheleli.