Ivale igebe kwabanemindeni emikhulu iMitsubishi 
Destinator

I-MITSUBISHI ikhiphe unyawo ngohlobo lwemoto ehambisana nezikhathi eziguquguqukayo nobuchwepheshe obungenisa ngesivinini bezimoto zesimanjemanje.

I-Destinator ivala igebe ezimotweni
zakwaMitsubishi ngomkhiqizo wemoto efanele umndeni omkhulu nengalingana amalungu awu-7. Lolu hlobo lwemoto lwethulwe ngokusemthethweni kuleli ngoMashi nonyaka, kanti ithakaselwe ngabaningi abangabathandi bezimoto zakwaMitsubishi.

Abakwa-Mitsubishi bese begabise iminyaka ngohlobo lwezimoto ezithenjwayo okubalwa kuzo
iMitsubishi Triton, iMitsubishi Pajero Sport ne-Outlander, yingakho umkhiqizo weDestinator ube nesasasa.

I-Destinator yona ilethelwe imakethe nabathengi bezimoto ababheke izimoto ezifanele imindeni ngenxa yobukhulu bayo nenani layo. Le moto ilula ngokwesisindo nangendlela eshayeleka ngayo emgwaqweni, uma uyiqhathanisa nezinye 
zakwaMitsubishi.

Lokhu kuzokwenza abathanda izimoto
zakwaMitsubishi babe ne-SUV ebingekho phambilini nokunesikhathi abakwaMitsubishi bagcina ukuba nemoto entsha nje emakethe.

I-Destinator inenjini kaphethiloli engamalitha awu-1.5 ye-turbo, no-120 khilowathi (kW), u-250 Nm torque kanti iwumshini ozishintshayo. Ifanele izindlela zansukuzonke kanti ivulekile ingamsebenzela umalume noma umalumekazi obheke imoto yokuthutha abantwana besikole noma umndeni omkhulu.

Ingamfanela nozisebenzayo, ikakhulukazi odayisa izimpahla azidilive, ngenxa yokuvuleka kwayo lapho ulalisa izihlalo ebhuthini.

Idonsa ngaphambili kanti ilufanele uhambo olude emigwaqweni yetiyela, obhuqwini nasezindaweni ezingenawo amatshe amaningi.

Ayizifuzile ezakubo kwaMitsubishi, ngakho ngeke wakwazi ukuhamba emigwaqweni engenalo itiyela noma uqwale ngayo intaba. Yona ithe ukunethezeka kodwa kayinawo amandla njengalezi ezinye.

Ngiyithole ifanelekile kumuntu onezindlela eziningi, nosebenzisa imoto ukuya emsebenzini ngoba nakuphethiloli iyonga njengoba idla uphethiloli ongangamalitha awu-7.2 kumakhilomitha awu-100. Ezinsukwini eziyisithupha ngihamba ngayo ngophethiloli obugcwele phama nezindlela ezilinganiselwa kumakhilomitha awu-20 ngosuku, ngize ngayigcwalisa ngosuku lwesithupha.

Kwezobuchwepheshe iDestinator iqukethe okujwayelekile ezimotweni zamanje, okufana ne-bluetooth oxhuma umakhalekhukhwini wohlobo lwe-IOS noma i-Android. Ine-touchscreen esiwu-12.3-inch esinayo yonke imixhantela ehambisana nobuchwepheshe besimanjemanje.

Idlala umculo nomsakazo ngeYamaha, inekhamera ekukhombisa amacala emoto ku-360 degrees, kanti uyakwazi ukushaja umakhelekhukhwini ngaphandle kwekhebuli.

I-Destinator inama-airbag ayisithupha kanti iyakwazi ukukuxwayisa ngemoto eza emaceleni nangemuva, iphinde ibe nezinsiza uma usengcupheni yengozi yokushayisa ngaphambili. 

Okwenza ithembeke iDestinator, wukuthi iwumkhiqizo wenkampani enegama nethenjwayo ngokubambelela kwayo emgwaqweni. Ngenxa yokuthi le moto iseyintsha emakethe, kayikakabi nomlando oveza ukumelana kwayo nezimo zomgwaqo nobuhixihixi engaba nabo emuva kwesikhathi uyithengile.

Inani leDestinator lisukela ku-R489,990 kwi-GLS CVT bese i-Exceed CVT yona isuka ku–R569,990.
Kulindeleke iqhudelane neToyota Corolla Cross, iChery Tiggo 8 Pro, iJetour X70 Plus, iMahindra XUV700, iHyundai Alcazar, iHaval H6 ne-Volkswagen Tiguan Allspace.