09 | Izindaba
Friday, 08 August 2025
Lo mcimbi ubhekwe ukuba ube ngomunye wemikhulu...
Umnikazi weqoqo (collection) elizowina, uzohlomula ngokuyokhangisa umsebenzi wakhe wiSeychelles Fashion Week
Makhosi Dube
BAZOBHEMA bakholwe abathandi nabasiki bengqephu nosomabhizinisi abasafususa abasemkhakheni wezobuhle, ukuzicwala nokuzinakekela, emcimbini owenzeka kanye njalo ngonyaka, owaziwa ngeSouth Coast Annual Business Fair. Wunyaka wesithathu lo mcimbi wenzeka. Uzobanjelwa e-Ugu Sport Leisure, eGamalakhe ngomhla ka- 29 no-30 Agasti.
Ophakathi nendawo ngumhleli weSouth Coast Annual Business Fair ongumsiki wengqephu, uNkz Makhosazane Ntshangase weSistas Felas.
Umhleli walo mcimbi ongumsiki wengqephu, uNkz Makhosazane Ntshangase weSistas Felas uthi: "inhloso yawo wukulekelela nokunika abamabhizinisi inkundla yokuzibonakalisa, wukufukula intsha nokudala amathuba emisebenzi ikakhulukazi kwezemfashini, ezokuphaqula nezokuzinakelela," esho.
Lo mcimbi kubhekwe ukuba ube ngomunye wemikhulu Ogwini, njengoba uzonika ithuba izitshudeni zemfashini, osomabhizinisi abasafufusa, imifelandawonye eqhamuka ezindaweni ezahlukene, ukuba baveze imisebenzi yabo. Ziwu-6 izifunda okubhekwe ukuba zibambe iqhaza kulo mcimbi; Ugu, UMgungundlovu, iGauteng, iKing Cetshwayo, iHarry Gwala, iNelspruit, Ilembe, Umzinyathi ne-Alfred Nzo.
Kuzoba nemibukiso enhlobonhlobo yemfashini (exhibitions), umncintiswano wokuthunga (sewing bee), lapho izingubo zizothungwa bukhoma phambi kwezihlwele kusukela ziqala zize ziyophela. Zizobe seziyakhangiswa emuva kwalokho, futhi kube nomncintiswano wabacwala ubuso (make up and beauty) nezingxoxo zokucobelela osomabhizinisi abakule ndima.
Kumenywe ochwepheshe abasemikhakheni ehlukene njengoba kwezobuhle kuzoba khona abakwa-Edgars Beauty, abeziphaqulo zakwaMac abazoba neMaster Class kulo mkhakha, behambisana noDiva Caddash.
NguDiva Caddash ozoba ngomunye wongoti wabazocobelela abafisa ukwazi ngezokuziphophotha.
Bawu-41 abazoncintisana kwi-exhibition, lapho kuzogqama khona ubuchwepheshe bokuhlanganiswa kukakotini nendwangu. Abawu-10 abazophumelela, bazothola umklomelo wokuthi izimpahla zabo zidayiswe eFlair Designers Emporium, esePort Shepstone Mall, unyaka wonke.
Ozophumela emncintiswaneni wokuthunga bukhoma i-sewing bee, uzohlomula ngomshini wokuthunga i-F4 Jack industrial, owuxhaso oluvela eSayidi Fashion School.
Iqoqo le ngqephu (Collection) elizophumelela kwi-fashion show, umnikazi walo uzohlomula ngohambo ayotshengisa ngomsebenzi wakhe kwiSeychelles Fashion Week, exhaswe ngabakwaKZN Department of Economic Development, Tourism and Enviromental Affairs (KZNEDTEA).
Kulesi sigaba kulindeleke ukuba abasiki bengqephu bakhangise izingubo eziwu-10, umuntu ngamunye.
Zizodlana imilala kwi-sewing bee lapho abancintisanayo bezothunga izingubo bukhoma.
Kuzobe kukhona ongoti abehlukene kwezengqephu okubalwa kubo uTrevor Ntombela wakwa-Egdars, uNolwazi Mazubane weFDE Flair Designers Emporium noKgomotso Seboko onguphrojusa wama-fashion shows ne-International Modelling Coach.
Zizodlana imilala kwi-sewing bee, lapho abancintisanayo bezothunga izingubo bukhoma. Ngochwepheshe abangabasiki bengqephu abazobonakala kwiSouth Coast Annual Business Fair. Kusuka kwesokunxele nguJonjo UG, nguKgomotso Seboko noZamaswazi Nkosi.
Kanti uzogadla nangochwepheshe kwezengqephu abaqhamuka ngaphandle kwakuleli, njengoba kuzobe kukhona uJonjo UG wase-Uganda, osezakhele igama kulo mkhakha emhlabeni jikelele, noZamaswazi Nkosi ongumsiki wengqephu ogila izimanga njengoba egqokisa osaziwayo.
Ngale kokuningi okuzobe kwenzeka, lo mcimbi uzogaba ngomculo, kuzonandisa uZandie Khumalo, uDJ Happygal noDJ Collen Zondo. Kungenwa mahhala amathikithi eVIP aqala ku-R250 kuya ku-R300. Ayotholakaka khona emcimbini.