Kuzogqama amasiko nezemvelo kwethulwa inyanga yezokuvakasha

Lucky Cain 

ZIZOQHUBEKA nokugxila kwezithinta amasiko, ubuhle bemvelo nokumbandakanya umphakathi wasemakhaya ezokuvakasha KwaZulu-Natal, njengoba kulindeleke ukuba kwethulwe ngokusemthethweni inyanga uSeptember ehambisana nalo mkhakha.

Inyanga yezokuvakasha esifundazweni izokwethulwa ngomcimbi wekhethelo ozoba ngomhla ka-11 kuSepthemba, eMpangeni. Kulo mcimbi kulindeleke ukuba uMfu Musa Zondi onguNgqongqoshe wezokuVakasha, Ezemvelo nokuThuthukiswa koMnotho esifundazweni, athule ngokusemthethweni le nyanga emqoka esifundazweni.

Ngaphandle kwalokhu inyanga yezokuvakasha esifundazweni igabisa ngokutholakala kusona kwezokuvakasha njengoba sinamabhishi, izintaba nomlando waKwaZulu onothile.

Umkhakha wezokuvakasha kulesi sifundazwe, udlala indima emqoka ukuthuthukisa umnotho, nokwakha amathuba emisebenzi.

Isikhulu sohlaka lwezokuvakasha kulesi sifundazwe, iKZN Tourism And Film Authority, uMnu Sibusiso Gumbi sichaze ngokubaluleka kokugubha le nyanga ikakhulukazi ingqikithi yayo okuwukuthuthukisa umphakathi ngalo mkhakha nokuvula amathuba omnotho, ikakhulukazi kubantu abasha.

Kule nyanga lolu hlaka luzoba nemikhankaso nezinhlelo ezahlukene ezihambisana nokugubha lo mkhakha. Phakathi kwezinhlelo ezihleliwe, kubalwa oluthinta abafundi abanentshisekelo ngalo mkhakha, umkhankaso wezokuphepha kwezokuvakasha, imigubho yesintu ehlanganisa UMkhosi woMhlanga noMkhosi weLembe, usuku lokugubha ezokuvakasha emhlabeni (World Tourism Day), nezinye.