Ugabe ngabanohlonze umdlalo omusha 
kwiBET

Yingxenye yabalingisi abazobonakala kwiBlack Gold. Kusuka kwesobunxele nguNomalanga Shozi, nguDawn Thandeka King, nguWarren Masemola noSello Maake kaNcube.

Lucky Cain

UGABE ngabalingisi abanohlonze umdlalo owuchungechunge kamabonakude iBlack Gold, okulindeleke ukuba uqale ukukhonjiswa esiteshini esizimele BET DStv Channel 129, kusukela ngoMsombuluko mhla ka-18 kwephezulu
ngo-21:30 ebusuku.

Lo mdlalo ozodlala kusukela ngoMsombuluko kuya kuLwesine, ugabe ngabalingisi okubalwa kubo uNomalanga Shozi ozodlala indawo ephambili
ka-Amanda Zungu, uSello Maake KaNcube, uDawn Thandeka King, u-Ernest Ndlovu, uNomsa Buthelezi, uZamani Mbatha, uThulani Mtsweni, uSiphesihle Vazi, uWarren Masemola nabanye.

Ngokusho kwesitatimende, lo mdlalo umayelana nowesifazane u-Amanda Zungu ohlangabezana nezingqinamba ngemuva kokubulawa kukayise ngesihluku. Ngeshwa ube nebhadi lokubhecwa ngobende inyama engayidlanga, esolwa ngunina ongamzali ngokuthi nguyena obulale uyise.

Kulo mdlalo kuzophinde kubonakala uSweet Guluva, osanda kunqoba emncintiswaneni kamabonakude iBig Brother. UGuluva uzobe eqala ukuveza ikhono lakhe lokulingisa kulo mdlalo nakuba kuzobe kuyindawo engekho nkulu, kodwa uzokwazi ukuzibonakalisa kuwona.

I-BET ingesinye seziteshi esikhombisa ukwandisa imidlalo kamabonakude evutshelwe kuleli, njengoba eminye ekhonjiswa kuyona kubalwa kuyo Isono, Have Faith, Black Tax neminye.