Kuzohlomula nosomabhizinisi abancane ngomcimbi kamaskandi

Abasesithombeni nguNkeshemba, uMafikizolo, Bahubhe, abayingxenye yabazonandisa kwiMzumbe Maskandi Festival.

Thokozani Ndlovu

KUZOHLOMULA nosomabhizinisi abancane ngomcimbi kamaskandi ozoba ngowokuqala ubakhona iMzumbe Maskandi Festival, ozoba ngoJuni 16, enkundleni yezemidlalo, Esibanini.

Kuwona kuboshelwe izintandokazi zabaculi bakamaskandi, okungoKhuzani, Inkosi yaMagcokama, uNtencane, uBahubhe, uMjolisi, uMafikizolo, uFeza, uShenge Wasehlalankosi, uNkeshemba nabaculi bendawo.

Kuzohlonishwa ngokukhethekile uMjolisi, ongumculi osevelele nosephakamise indawo yaseMzumbe, ngokwenza kahle emculweni.

Ngumlingisi woZalo uSimphiwe Majozi oyinxusa lomcimbi, uMzumbe Maskandi Festival.

Kuqokwe umlingisi woZalo uSimphiwe Majozi, ukuba yinxusa lalo mcimbi njengoba naye edabuka kule ndawo.

Umsunguli wawo u-Eve Mseleku uthe ubone kungaba yithuba elihle ukuthi avulele nabanye osomabhizinisi ithuba ngalo mcimbi, njengoba bezovunyelwa ukuba badayise kuwona, kanti nabaqashisa ngezindawo zokulala bazohlomula ngokunjalo nabamatekisi okuyiwona azobe ethutha abantu.

“Isikhathi esiningi kuvamise ukuthi kuvele mina emicimbini eminingi ekhona, kanti bakhona nabanye osomabhizinisi. Ngithathe isinqumo sokuthi ngibanike ithuba ngalo owami. 

Uthe abaculi bendawo abanikwe ithuba ukuthi babe yingxenye yomcimbi kabazogcina ngokunandisa kuwona, kodwa banesivumelwano nenkampani yomculo iSold Out Media, ezobathuthukisa ekwenzeni umculo wabo.

UBahubhe uncome ukunikwa kwabo ithuba nokuthi umcimbi ungakubo, njengoba ekhale ngokuthi  kudala bebandlululwa ezindaweni eziningi.

“Ngesikhathi singena emculweni besinenkinga kakhulu, abantu bengakholelwa kithina ngoba bengasazi. Leli yithuba elikahle kubaculi abasafika, ngoba isikhathi esiningi kawaveli amathuba anje endaweni esisuka kuyona.

"Ugcina usuzama inhlanhla yokuziveza ezindaweni ongaziwa kuzona, bafike bakucwase ngoba bengakwazi,” kusho uBahubhe.

Amathikithi aseyatholakala eWebtickets nasePick n Pay ngo-R130, R150 no-R1500 awezicukuthwane, afaka abantu ababili.,