Konke sekumi ngomumo ngomcimbi wesihlabani saphesheya

U-Anthony Hamilton usethelekile kwelikabhanana ukuzozilungiselela...

 Ngu-Anthony Hamilton, oteketiswa ngelikaMzwandile.

Lucky Cain 

KONKE sekumi ngomumo ngomcimbi wesihlabani saphesheya kwezilwandle,
u-Anthony Hamilton, ozoba seNkosi Albert Luthuli International Convention Centre (ICC) ngoMgqibelo, mhla ka-28 kwephezulu.

Lesi sihlabani esesike sahlabana ngendondo yeGrammy, sitheleke ngoLwesithathu eThekwini ukuzolungiselela lo mcimbi okuzobe kubungazwa kuwona uthando, kwazise kuzobe kuvalwa inyanga yothando.

Lo mculi uthembise ulozolo lomcimbi njengoba ebalule iTheku njengelinye lamadolobha asenhliziyweni yakhe. Uthi wagcina ukunandisa kuleli dolobha eminyakeni ewu-12 eyedlule.

 NguSjava, ozoshiyelana inkundla no-Anthony Hamilton,
e-ICC, eThekwini.

Kulo mcimbi u-Anthony oteketiswa ngelikaMzwandile uzobe eshiyelana inkundla nentandokazi yakuleli uSjava, osanda kwethula i-albhamu yakhe esihloko sithi, Inkanyezi Nezinkanyezi.

Uzophinde abhulelwe amazolo ngoDJ asebezakhele igama ngokudlala umculo opholile, okubalwa kubo uTbose Mokwele, uDJ Young, uMsizi Shembe, uCollen Zondo nabanye.
Amathikithi ayatholakala eComputickets.