I-Eskom nesiphakamiso sokunyusa ugesi ngo-8,8%

Thandoluhle Ngubo

KUBUKEKA zisazothwala kanzima izakhamizi zaseNingizimu Afrika ngenxa yamanani kagesi, njengoba i-Eskom ifake isicelo kwiNational Energy Regulator of South Africa (Nersa), ifuna ukuwanyusa ngo-8,8% kunyakamali ozayo.

INersa ikhiphe isaziso sokuthi izakhamizi zakuleli ziphawule ngalezi zinguquko. Leli phephandaba selibike izikhawu ngohlelo lwe-Eskom lokunyusa amanani kagesi iminyaka emithathu ilandelana, kusuka kunyakamali ka-2025/26 kuya koka-2027/28.

Ngo-2025, i-Eskom yayifake isicelo sokuthi amanani kagesi anyuke ngo-36%, owawuzohlukaniswa izigaba ezintathu.

INersa yakuchitha lokho, yaphakamisa ukuthi i-Eskom yehle kuleso sicelo. Ngemuva kwezinyanga kwenzeke lokho, iNersa yaphasisa ukuthi i-Eskom inyuse amanani ngo-12,74% kulowo nyaka.

Kulo nyakamali, ugesi unyuke ngo-8,76% njengoba i-Eskom seyifuna ukuwunyusa ngo-8,8% ngonyaka ozayo.

Isikhulu esiphezulu esibhekelele ugesi kwiNersa, uMnu Rhulani Mathebula (osesithombeni), sithi imibono yezakhamizi zakuleli, ibaluleke kakhulu ekuthathweni kwezinqumo ngokunyuka kukagesi.

"I-Eskom isaqhubeka esivumelwaneni sokukhuphuka kwamanani kagesi iminyaka emithathu ilandelana, esaba naso ngo-2025.

"Esikufunayo njengoba sithi izakhamizi zakuleli maziphawule ngalesi sicelo, wukuthi uma zikhala, sizame ukuthola indlela yokunyusa ugesi ezoba nobulungiswa kuzo," esho.

UMathebula uthi abafisa ukubeka imibono bangathumela i-email ku-ertsa@nersa.org.za ngaphambi kwehora lesine ntambama ngomhla ka-2 October.