Uveza akufisayo ngengoma yakhe noKhozi FM okamaskandi osematheni

Nhlanhla Hudla

USELUBALUBELA ukubona ingoma yakhe ingena kweziwu-10, ezizoncintisana ukuhlukanisa unyaka kuKhozi FM uThubalethu "Feza" Langa (29) (osesithombeni), ongumculi kamaskandi osematheni kulezi zinsuku.

Lo mculi usematheni ngengoma yakhe ethi, "Sengithole Omunye", edlala ezindaweni eziningi eNingizimu Afrika.

ILANGA Lempelasonto likhulume nalo mculi odabuka eNquthu, othe uzizwa ethobeke kakhulu ngendlela amukelwe ngayo emculweni, yize engakaqedi ngisho unyaka engenile kulo mkhakha.

"Nginezinyanga eziwu-11 ngingenile emculweni. Engikufisayo manje wukubona ingoma yami ingena kweziwu-10 ezizohlukanisa unyaka.

"Ukungena emculweni kuyishintshe kakhulu impilo yami. Sengiphumelele ukufukula umndeni wami, ngathenga nemoto.

"Ngingena emculweni nje, bengiphuma ekolishi. Bengenza izifundo zobuthishela, ngaziphothula ngo-2024.

“Into engijabulisa kakhulu wukubona abazali bami bengeseka kukhona konke engikwenzayo,” kusho uFeza.

Ingoma yalo mculi ibe sematheni kakhulu, njengoba ithakaselwe ngisho ngabadlali bebaBafana Bafana ngesikhathi seNdebe yoMhlaba yeFifa ebise-United States of America, eCanada naseMexico nonyaka.

Kubadlali asebeke babonakala bethakasela le ngoma, kubalwa u-Oswin Appollis odlalela i-Orlando Pirates, noJaden Adams osanda kudlula emhlabeni, obedla kwiMamelodi Sundowns.