I-Sadtu iphikise isinqumo sekhabhinethi sokuncishiswa kwezikhala zothisha

Owomnyango uthi wukunqanyulelwa
isabelo-mali iminyaka ilandelana, okudala lesi simo...

IVEZA itulo lokushaywa ngesithende isinyenyela kothisha ohlelweni lokuqashwa kwabo inyunyana.

I-National Teachers Union (SADTU) KwaZulu-Natal, ichithe uNgqongqoshe wezeMfundo kulesi sifundazwe uMnu Sipho Hlomuka, okuthiwa ubethunywe yiKhabhinethi yesifundazwe ukuba adlulise umyalezo wokuthi uhulumeni uzokwehlisa ukuqashwa kothisha kwezemfundo ngenxa yezinkinga zemali.

Kuvela ukuthi uMnyango wezeMfundo unezisebenzi eziwu-90 000, ezizokwehliswa ziye ku-87 000 ngonyaka ozayo, kusukela ngoJanuwari.

NguNobhala weSadtu KwaZulu-Natal, uNkz Nomarashiya Caluza.

UNobhala weSadtu KwaZulu-Natal, uNkz Nomarashiya Caluza, uthi sekuphele iminyaka engaphezulu kuka-10 isibalo sezisebenzi zezemfundo singanyuki ku-90 000.

Utshele ILANGA Lempelasonto ukuthi lokhu okukhulunywa yikhabhinethi nongqongqoshe, abahambisani nakho.

"Kusiphatha kabi ukuthi ikhabhinethi, ikakhulukazi ihhovisi likamgcinamafa, lithathe isinqumo esifana nalesi. Imfundo ibalulekile ezinganeni, akukwazi ukuthi kungancishiswa izikhala kungaqashwa," esho.

Uthe uma kuvunyelwa lesi sinqumo sikahulumeni ukuba siqhubeke, kuzoshayeka kakhulu izikole ezithembele emalini yezinsiza-kusebenza, ngoba azinayo enye imali eziyithola emaceleni.

"Izikole ezizimele zingakwazi ukuzigcwalisela izikhala, zothisha, kodwa lezi ezithembele emalini yezigungu zezikole (School Governing Body), ngeke zikwazi ukuzenzela izinhlelo zokuqasha," esho.

Uthi lolu hlelo olusha luyindlela ehloniphekile yokudilizwa kothisha emsebenzini, nabangasebenzi baduve emakhaya neziqu zabo. Lolu hlelo lwenziwa ngenxa yokuthi sekulungiselelwa unyaka ozayo.

Okhulumela uMnyango wezeMfundo KwaZulu-Natal, uMnu Muzi Mahlambi uthi uMnyango wezeMfundo unezinkinga zemali.

"Lolu daba lusaxoxwa ezingeni lekhabhinethi. Ungqongqoshe usaxoxisana nezinhlaka zonke ezithintekayo kwezemfundo," esho.

UMahlambi utshele leli phephandaba ukuthi njalo ngonyaka ungqongqoshe wezemfundo kufanele atshele ikhabhinethi ukuthi zingaki izikhala zomsebenzi ezivuliwe.

"Ngenxa yokuthi umnyango unqanyulelwa isabelo mali iminyaka ilandelana, kusho ukuthi kuzoncipha ukuvalwa kwezikhala okwamanje," kusho uMahlambi.
mthobisis@ilanganews.co.za