Zizobangisana ngesibusiso soNyazi izinkunzi zeDerby

Phumlani Gama

IZINKUNZI zaseSoweto, iKaizer Chiefs, etekiswa ngelokuthi 'Abafana bokuthula noxolo', ne-Orlando Pirates yona ebizwa ngele 'Bhakabhaka', zizobangisana ngesibusiso somholi webandla lamaNazaretha ohlangothi lwaseBuhleni, iNkosi uMduduzi 'Nyazilwezulu' Shembe. 

La makilabhu azogadulisana emdlalweni wamanqa-mu weNedbank Cup enkundleni yezemidlalo iMoses Mabhida, kusasa ngoMgqibelo. Womabili la makila-bhu azoya kulo mdlalo enethemba lokunqoba ngesibusiso salo mholi.

Emasontweni amabili edlule, ILANGA Lempelasonto libike ngohambo lobuholi beZimpofana obebuholwa nguKaizer Junior Motaung, oyisikhulu sayo le kilabhu esibhekelele ukusebenza kwansuku zonke.

Le kilabhu yayikade iyocela isibusiso ngoba ifuna ukunqoba umdlalo owawuphakathi kwayo neMamelodi Sundowns. Lowo mdlalo wawungowo-kwandulela owamanqamu.
Amakhosi (akwesingezansi) awunqoba lowo mdlalo.

 Umthombo osondelene nomholi waleli bandla, utshele leli phephandaba ukuthi ngoLwesithathu iphinde yabuya le kilabhu izocela ukunqoba umdlalo wamanqamu ngoMgqibelo.

"Zifikile izikhulu zeChiefs zizocela isibusiso. Abakushilo bathe bazocelela ukunqoba umdlalo wakusasa. Kube nesikhathi abavalelene ngaso nobaba (uNyazi). Kasinalo-ke ulwazi lokuthi ngaleso sikhathi bekukhulunywa ngani," kusho umthombo ongomunye wabashumayeli abasebenza noNyazi.

Ngakolunye uhlangothi, kuvela ukuthi nayo i-Orlando Pirates (ekwesingezansi) igabe ngaso isibusiso salo mholi emuva kokuba ngenyanga kaMfumfu (October) nyakenye, kubonakale izikhulu nabadlali bayo behlangene nalo mholi, beyokwethula indebe ye-MTN 8, bacela nezibusiso.

ILANGA Lempelasonto lizamile ukuxhumana nokhulumela ibandla lamaNazaretha, uMnu Lizwi Ncwane, kwangalunga. Ucingo lwakhe belungangeni. Okhulumela uNyazi, uMnu Thokozani Mncwabe, ukuqinisekisile ukufika kwezikhulu zale kilabhu.

"UNyazi lubusisa wonke umuntu ofikayo ezocela isibusiso. Abantu bafika bezocela ukubusiswa wuNyazi, maqede likwenze lokho. Kuya ngokuthi lihlobe kangakanani igceke nenhliziyo yalowo ocela ukubusiswa," kuphetha uMncwabe.

Leli phephandaba lizamile ukuxhumana noMnu Vina Maphosa okhulumela iKaizer Chiefs. Ucingo ubeluba-mba kodwa angakhulumi. Phambilini watshela leli phephandaba ukuthi uhambo lukaMotaung eyohlangana noNyazi, kwakuwuhambo lwangasese.

Okhulumela i-Orlando Pirates, uThandi Merafe, ushaye ngamafuphi, wathi akukho azokuphawula maqondana nalolu daba.

"Mina kangizikhulumi izindaba ezingaphandle kwenkundla. Mina ngikhuluma izindaba ezithinta abadlali nenkundla," kusho uMerafe.