'Yasocongwa ngesibhamu eyabulala ngaso isisulu inkabi'

NguSimiso Jarome Liphenyana, ongomunye wabasolwa kwelokubulawa kukaNkz Noluthando Khomo.

Thandoluhle Ngubo

KUVELE ukuthi kwasetshenziswa isibhamu esisodwa, kubulawa inkabi eyabanjwa ngamalungu omphakathi iyolahlala isidumbu sowesifazane okusolwa ukuthi wabulwa nguyise wengane yakhe nenkosikazi yakhe, esigamekweni esenzeka
ngo-2017.

Lokhu kuvele njengoba kuqhubeka ukuqulwa kwecala lokubulwa kukaNkz Noluthando Khomo, elibhekene noyise wengane uMnu Thokozani "Sgci" Mchunu (43), nenkosikazi yakhe uNkk Nomusa Precious Mchunu (39), eNkantolo eNkulu yaseMgungundlovu.

Ngokwamaphepha asenkantolo, uNkk Mchunu, nguye owahlela ukubulawa kukaNkz Khomo, njengoba wayedinwa wukuthi usebudlelwaneni bezothando nomyeni wakhe. Kuthiwa umzamo wakhe wokuqala wokubulala uNkz Khomo wehluleka, njengoba atholakala ehlathini elise-Ashburton, eshaywe kanzima.

Ngumufi uNkz Noluthando Khomo.

Okwesibili waphumelela, uNkz Khomo watholakala edutshulwe, wabulawa ngemuva kokuba ayethathwe nengane yakhe eyayinezinyanga ezintathu ngabantu ababili ababezenze amaphoyisa, okunguMnu Sanele Ngcobo noSimiso Jarome Liphenyana.

Kuthiwa ngemuva kokuba bebulale uNkz Khomo laba balisa, baya kwelinye lamahlathi eliseSnathing, khona eMgungundlovu, beyolahla isidumbu, behamba nengane kamufi eyayidubuleke engalweni.

Kuthiwa ingane babe sebeyishiya emotweni ababehamba ngayo yohlobo lweVW Golf nesidumbu. Kuvela ukuthi kuyo leyontambama babuyela ehlathini ngenhloso yokuyoshisa imoto nesidumbu sikaNkz Khomo, nengane yakhe eyayisaphila.

Uhlelo lwalaba lwaphazanyiswa ngamalungu omphakathi ababhadama, ababeka izandla, uLiphenyana wakwazi ukuphunyula abaleke. UNgcobo waboshwa, wethweswa amacala, elokuthumba, elokuzama ukubulala, elokubulala nelokuzama ukuphazamisa kusebenza kwengalo yomthetho, kodwa wadedelwa ngebheyili.

NguMnu Thokozani "Sgci" Mchunu osolwa etulweni lokubulawa kukanina wengane yakhe nenkabi.

Kuthiwa laba abashadile babona ukuthi uNgcobo uzohlanza iqiniso emaphoyiseni babe sebehlela ukuthi abulawe. Kuthiwa uNgcobo wadutshulwa ngumuntu ongaziwa, washonela esibhedlela.

Ekuhambeni kwesikhathi kwaboshwa uLiphenyana, wakhipha iqiniso, wagwetshwa iminyaka ewu-8 ngamacala okuthumba uNkz Khomo nengane yakhe, ngaphambi kokuba aphenduke ufakazi wombuso.

Ngesikhathi kufakaza uLiphenyana ngoLwesibili, uveze ukuthi uNgcobo nguye owadubula uNkz Khomo ngesibhamu esiyivolovolo.

Lichitha ubufakazi bukaLiphenyana uhlangothi lwabameli babamangalelwa, lutshele iJaji uNamhla Thina Siwendu, ukuthi imibiko elihlinzekwe ngayo wumbuso, iveza ukuthi isibhamu esabulala uNkz Khomo negobolondo lenhlamvu eyatholakala endaweni yesigameko, siyefana nalesi esabulala uNgcobo.

Lisole uLiphenyana ngokubulala uNgcobo, ngesibhamu asisebenzisa ebulala uNkz Khomo, ngoba ebona ukuthi uzomveza emaphoyiseni, aboshwe.

ngubo@ilanganews.co.za