NGUNONGCEBO Faith Ntombela namangalelwe nabo, uKhulani Cele noMnu Sithembiso Khumalo, ekwakheni itulo lokubulala uCapt Zwelakhe Thomas Ntombela, obeyiphoyisa likaMasipala weTheku.

U-principal wehlulekile wukuchaza ngayekuxoxa nabamyamanisa nokubulawa kwephoyisa 

Thandoluhle Ngubo

WEHLULEKILE wukuhlinzeka inkantolo ngezizathu "ezibambekayo" ebezenza axhumane nabamangalelwa ababili, abayanyaniswa necala lokubulawa kowayengu- kapteni wamaphoyisa kuMasipala weTheku, uCapt Zwelakhe Thomas Ntombela, uthishanhloko waseMpumulwane Primary School, uMnu Sithembiso Khumalo.

UKhumalo ubegibele ebhokisini lofakazi ngoLwesibili nangoLwesithathu, ephekwa ngemibuzo ngumshushisi u-Adv Krishen Shah.

Ubephendula imibuzo ethinta ukubandakanyeka kwakhe ekwakhiweni kwetulo lokubulawa kukaNtombela, okuthiwa lahlelwa yinkosikazi kaNtombela, uNongcebo Faith Ntombela.

Kuthiwa walihlela noKhulani Cele oyinkabi eyadubula yabulala uNtombela, uMandlenkosi "Mzo" Ntombela, owavuma icala wagwetshwa iminyaka ewu-20, noKhumalo. UFaith, uMzo noCele bathi uKhumalo wayeyingxenye yokuhlelwa kwetulo lokubulawa kukaNtombela.

Eziphendulela uKhumalo, uthi okuvezwe yilabo fakazi, akulona iqiniso. Uthi akazi kungani uFaith noCele bemyamanisa necala.

Wehlulekile wukuchazela inkantolo ukuthi yini ayeyikhuluma noCele noMzo ngocingo ngaphambi kokubulawa kukaNtombela nangemuva kwezinsuku eziyisihlanu ebulewe, okuyilapho okwanqamuka khona ukuxhumana kwabo.

"UFaith angikaze ngixhumane naye ngihlele itulo, angikaze ngibe nayo nenombolo yakhe yocingo, kangazi kungani engifaka kuleli cala.

"UCele besazana, sixhumana naye ngesikhathi esejele, kodwa besixhumana njengomakhelwane, engibuza okwenzeka emndenini wakhe noma efuna ukudlulisa umyalezo kuwo.

"UMzo nguye engikholwa wukuthi unezizathu zokungiyamanisa necala. Lokho ngikusho ngoba kunesikhathi lapho esaxabana khona ngamxosha nasemzini wami, ngoba entshontshe inyama yengulube wayoyidayisa esebenzisa imoto yami, mina ngingazi.

"Nakuba saxolelana ngemuva kwaleso sigameko kodwa ubudlelwano bethu kabuphindanga babuhle," echaza.

Eqhubeka empheka ngemibuzo umshushisi, ubuze ukuthi ngabe uKhumalo wayenalo yini ulwazi ngokwakuzokwenziwa nguFaith KwaMaphumulo. UKhumalo waphendula ngokuthi wayengazi, ulwazi aluzwa ngabantu ngelokuthi uFaith ungumakoti wakwaCele.

"Impendulo yakho iyashayisana nowakubhala esitatimendeni sakho. Uma usibuka kwisigaba sesi-7, akuwena owabhala ukuthi uMzo wakutshela ukuthi njengoba uFaith eKwaMaphumulo, uzofuna inkabi ezobulala umyeni wakhe?" kubuza umshushisi.

Eziphendulela uKhumalo, ukuchithile ukuthi watshelwa nguMzo, wathi ngesikhathi enza isitatimende ayekubhala kuso, wayekutshelwa ngamaphoyisa, wakubhala kunjengoba kunjalo ngoba wayethukile, eqala ukuvakashelwa ngamaphoyisa empilweni yakhe.

UKhumalo ube esephendula ngobufakazi obethulwe uMzo bokuthi bahlela ukubonana ejele laseWaterval, uKhumalo eyomcela ukuba angamyamanisi necala.

"Angikaze ngiye ejele laseWaterval. Kuyiqiniso ukuthi ngosuku okuthiwa ngaya ngalo ejele ngangingakoNewcastle ne-Utrecht, kodwa ngangiyothenga izinkomo epulazini okuthiwa yiNdaba Farm, ngangihamba nomakhelwane wami naye ongumfuyi," esho.

Umshushisi utshele inkantolo ukuthi kuyamangaza ukuthi uKhumalo aveze ukuthi wayehamba noNtuli beyothenga izinkomo ekubeni noMzo akuveza ukuthi ngesikhathi esejele eyombona wayehamba noMnu Ntuli (elingashiwongo igama).

"Engikubonayo wukuthi le nto yokuthengwa kwezinkomo yinto oyakhe manje, engelona iqiniso. Uma ningayanga ejele nabonana noMzo, ngabe ukuthathaphi ukuthi ngosuku owawuye ngalo e-Utrecht, wawuhamba noNtuli uma ningayanga kuye ejele.

"Phezu kwalokho ucingo lwakho lwavalwa isikhathi eside ngoba umthetho wejele awukuvumeli ukusetshenziswa nokuvulwa kwamafoni ejele," kusho umshushisi.

UKhumalo wehlulekile wukuphuma nempendulo eqondile yokuthi uMzo wayazingani ukuthi wayehamba noNtuli, watshela inkantolo ukuthi akasakhumbuli ukuthi kungani ucingo lwakhe lwalucishile.
Icala liyaqhubeka.