Umndeni ucacisa  eyokushiywa yibhanoyi kweTLB

Kusuke umsindo ezinkundleni zokuxhumana ... 

 Phumlani Gama

UPHAWULE okokuqala kwiphephandaba ILANGA Lempelasonto umndeni wakwaMbokazi KwaNibela, eHluhluwe okuzalwa kuwona uMbekezeli Mbokazi oteketiswa ngele-TLB ebholeni likanobhutshuzwayo, ngokushiywa kwakhe yibhanoyi elibangise ekhempini yeBafana Bafana, eGauteng ngoLwesibili.

Lokhu kususe umsindo omkhulu ezinkundleni zokuxhumana, ngemuva kokuba umqeqeshi weBafana Bafana uHugo Broos, ezwakalise ukungenami ngokufika ngemuva kwesikhathi ekhempini kukaMbokazi.

 Lo mdlali oyisitobha sasemuva uzifake ezinhliziyweni zabathandi bebhola kuleli ngokudlala ingcwenga yebhola ku-Orlando Pirates, nakwiBafana Bafana.

NgoLwesithathu kusabalale izindaba zokuthi ushiywe yibhanoyi esikhumulweni sezindiza iKing Shaka, eThekwini.

UMnu Mbongiseni Mbokazi onguninalume weTLB, uthi umshana wakhe ubesuka kubo eHluhluwe. Uthi kube nokubambezeleka okuncane kubo, okuholele ekutheni bafike esikhumulweni sezindiza isiphumile indiza obekufanele ahambe ngayo.

I-TLB ibilibangise ekhempini yeBafana yokulungiselela kokuqalwa kwemidlalo ye-Afcon, ezoqala mhla ka-21 kuDisemba kuze kube umhla ka-18 kuJanuwari 2026.

"Siphume ekhaya kuyimina nodadewethu ongunina kaMbekezeli, simphelezela. Kasibanga nankinga endleleni kodwa sibe neshwa lokuthi sifike esikhumulweni sezindiza, kwathiwa sesifike ngemuva ngemizuzwana, isiphumile indiza abezohamba ngayo umshana," esho.

Uthi babe sebebhukha ngokushesha ibhanoyi elilandelayo. Uthi umshana wakhe ubefikele ukuyobabona izinsuku ezimbili, ngaphambi kohambo lwakhe.

Igama likaMbekezeli lisematheni kulezi zinsuku njengoba ngoMgqibelo edlale umdlalo wakhe wokugcina kweZimnyama. Uthengwe yiChicago Fire, yase-USA.