Kuzokwenzeka okungajwayelekile amaNazaretha ehamba ngebhasi ukuya entabeni

Lokhu kwenziwa uma usuku okuhanjwa ngalo luqondene "nolokubingelela"  intaba

Skhosiphi Mthembu

AZOKWENZA okungajwayelekile ohambweni olubheke eNtabeni eNgcwele, iNhlangakazi lwangonyaka ozayo, amaNazaretha ohlangothini lwasekuPhakameni, aholwa yiNkosi uVukile "Incoyi- ncoyi" Shembe (osesithombeni esingenhla).

Lokhu kuvele engxoxweni ekhethekile nomkhulumeli wawo, uMnu Thetha Ngiba, oveze ukuthi ohambweni lwabo, bazohamba ngamabhasi, ngeke kuhanjwe ngezinyawo njengenjwayelo.

Kuzokhumbuleka ukuthi njengoba kusongwa unyaka ka-2025, zonke izinhlangothi zamaNazaretha zisuke zilungiselela ukuqala uhambo olubheke eNtabeni eNgcwele iNhlangakazi, bese kuthi uhlangothi lwaseBuhleni lona lubheke eKhenana, oZwathini.

Ngokujwayelekile lolu hambo luyaye luthathe izinsuku ezintathu, abazalwane basuke behamba ngezinyawo.

UNgiba uveze ukuthi uhambo lwabo luzoqala mhla ka-2 kuJanuwari 2026, behle ngomhla ka 7 Januwari.

Uveze ukuthi isizathu sokuhamba ngamabhasi, wukuthi usuku okuzoqalwa ngalo uhambo wuLwesihlanu, okuwusuku okusuke kubingelelwa ngalo intaba ngaphambi kweSabatha.


Uthe lokhu kuyabaphoqa ukuba basebenzise amabhasi ukusuka ekuPhakameni, ukuze bezofika ngalo usuku kule ntaba.

YINKOSI uVukile "Incoyincoyi" Shembe, ihola amalungu ebandla lamaNazaretha ohlangothini lwaseKuphakameni.

"Uma uzokhumbula kahle, kulo nyaka uhambo lwethu, saluqala ekuPhakameni, sihamba ngezinyawo ngoba kwakuwuLwesine.

"Kuthe sesiphakathi nalo ngalo uLwesine, sabe sesigibela amabhasi ngoba inhloso kwakuwukuthi ngoLwesihlanu sibe sesikhona entabeni.

"Kulokhu-ke umhla ka-2 uzobe ungoLwesihlanu. Kuyasiphoqa ukuthi sisuke ngawo amabhasi ekuPhakameni ekuseni, ukuze izoqala le nkonzo yokubingelela intaba, kugxunyekwe amatende kwenziwe nokunye ngaphambi kweSabatha," kusho uNgiba.

YINKOSI uVukile "Incoyincoyi" Shembe.

UMnu Thokozani Mncwabe wasohlangothini lwaseBuhleni, oluholwa yiNkosi uMduduzi "Nyazilwezulu" Shembe, uthe konke sekumi ngomumo mayelana nohambo olubheke eKhenana.

Uveze ukuthi uhambo lwabo luzoqala ngomhla ka-4 kuJanuwari. Uthe wuNyazi oluzosho ukuthi kuyokwehliwa nini.