Indlunkulu kaZulu icacisa eyokungaveli kweSilo emcimbini omqoka 

Kuthiwa sigonqile, silungiselela umkhosi...

 John Hlongwa

INDLUNKULU kaZulu icacisa ngokungabonakali kweSilo uMisuzulu kaZwelithini, emcimbini woSuku lokuBuyisana obuseNcome, eNquthu ngoLwesibili.

Lo mcimbi ubuhanjelwe nguMengameli wezwe uMnu Cyril Ramaphosa, nguNdunankulu waKwaZulu-Natal uMnu Thami Ntuli namabutho, ukukha phezulu.

Okhulumela iSilo uMntwana uThulani waseNdlini eZibindini, utshele ILANGA Lempelasonto ukuthi kulesi sikhathi esikuso manje, iSilo asibi yingxenye yanoma yimuphi umcimbi.

"Kuyiqiniso iSilo besingekho emcimbini woSuku lokuBuyisana ngenxa yokuthi sesilungiselela uMkhosi Woselwa, ozokuba sekuqaleni kukaJanuwari.

"Lo mkhosi uhlukana izigaba ezimbili; esokuqala kuye kuphume abakoninalume beSilo bayofuna okuthile, uma bebuya nje, sisuke sesiqala sigonqa iSilo.

"Isigaba sesibili, kulapho kusuke sekulindwe inyanga ukuba iphelele (full moon), bese wenziwa lo mcimbi. Ngawo kusuke kuhloswe ukuba kukhulekelwe ukudla emasimini, impilo esizweni nempilo yaso iSilo uqobo.

Umthombo waleli phephandaba ozinze ngaphakathi eNdlunkulu, ukuqinisekisile ukuthi iSilo sasithola isimemo sokuba yingxenye yalo mcimbi.

Isazi samasiko uMnu Khaya Ndwandwe ubhale incwadi, ebuza ukuthi kungani iSilo singabanga yingxenye yalo mcimbi obaluleke kangaka.

UMkhosi woSelwa wenziwa minyaka yonke uma kuqala unyaka, kanti 
ungeminye yebalulekile eNdlunkulu.