Kuyanda ukusetshenziswa
kwe-AI  ukuqola abantu ezinkundleni zokuxhumana

Thandoluhle Ngubo

ZIYANDA izigameko zamaqola asebenzisa uhlelo lwezobuchwepheshe i-Artificial Intelligence (AI), ukuqola abantu, kanti baningi abaphenduka izisulu zalo mkhonyovu.

Ngisho nosaziwayo imbala, nezikhulu emikhakheni ehlukene kaziphephile kulo mkhonyovu.

Izolo ngoLwesine umkhulumeli woMnyango wezokuHlunyeleliswa kweziMilo kuzwelonke, uMnu Singabakho Nxumalo, utshele ILANGA Lempelasonto ukuthi ubhekene nenkinga yokuthi kukhona ozenza yena ezinkundleni zokuxhumana, oqola abantu, ebathembisa izikhala zomsebenzi emnyangweni.

Uthi leli qola lifonela abantu, libathembise umsebenzi.

Leli qola lifuna inkokhelo ukufaka abantu emnyangweni

"Uma ngiyibheka ku-Truecaller le nombolo, ithi ingeka-S Nxumalo. Lo muntu ufonela amalungu omphakathi, afune kuwo inkokhelo ukuze awafake emnyangweni.

"Mangikucacise ukuthi njengomkhulu-meli womnyango, kangingene ezinhle-lweni zokuqasha emnyangweni, wumsebenzi wakwaHuman Resource, lowo. 

"Abantu kumele bakuqonde ukuthi kayikho inkokhelo efunekayo uma ufaka isicelo somsebenzi emnya-ngweni, futhi zonke izikhala ezivulekayo zomsebenzi ziyakhangiswa kwi-website yomnyango nasezinkundleni zokuxhu-mana zawo, nenombolo yami iyathola-kala kuyo i-website," kusho uNxumalo.

Ezinsukwini ezimbili ezedlule, umlingisi wakuleli uConnie Ferguson, unikele ezinkundleni zokuxhumana exwayisa abalandeli bakhe ngomuntu osebe-nzisa izithombe zakhe nama-video okwenziwe nge-AI, otshela abantu ukuba bamfakele imali noma bayitshale ebhizinisini lakhe.

Uthe ngesikhathi ehlola ukuthi inombolo eyenza lokhu ngekabani kwi-Truecaller, kwavela ukuthi yinombolo ebhaliswe ngoMadonsela. Uxwayise abantu ukuba bangavumi ukungena kulolu gibe.

Abantu baxwayiswa ngokungayifaki imali kula maqola

Omunye wosaziwayo obe yisisulu kwenziwa i-video nge-AI, nguKapteni waMabhokobhoko uSiya Kolisi (osesithombeni esingezansi).

I-video kaKolisi isabalale enkundle-ni yokuxhumana iX, enxenxa abantu ukuba batshale imali esuka ku-R4 400 ukuze benze inzuzo engafinyelela ku-R100 000.

Okuxakile ngale video wukuthi izwi belizwakala njengelomuntu wasezweni elingaphandle.