ZIWUSHAYILE kuKhuzani Mpungose nenkosikazi yakhe ebilindwe ngabomvu, uNkk Nonduduzo Mpungose, uKaMathenjwa, waseManyiseni, eNgwavuma.
ISITHOMBE NGU: JOHN HLONGWA

Ubelindwe ngamehlo abomvu emshadweni wakhe, unkosikazi womculi kamaskandi, uKhuzani

Ingqephu ibidla lubi, kugqokwe umbala omnyama kulo mcimbi obuseThe Zunguness Wedding and Conference, eHowick

Mthobisi Sithole

UBELINDWE ngamehlo abomvu ukubonwa unkosikazi womculi kamaskandi uKhuzani "iNdlamlenze" Mpungose emshadweni, njengoba bekulokhu kubuzwana ngaye nasendaweni yomshado obuseThe Zunguness Wedding and Conference, eHowick.

Nangesikhathi etheleka emcimbini wakhe uNkk Nonduduzo Mpungose, uKaMathenjwa, waseManyiseni, eNgwavuma, elandela emuva komyeni wakhe, abantu kabakholwanga ngenxa yokuthi ubelokhu efihliwe.

Abezindaba kabavunyelwanga ukushutha umakoti nangesikhathi esaphuma endlini abekuyona, kwaze kwaba ufika eduze komnyango wendlu yesonto.

Kuthiwe uKhuzani kumele kuze kube nguyena uqobo otshengisa izwe isithombe sakhe nenkosikazi, njengoba abantu bebengavunyelwe ukuveza lutho (ngalaba bashadikazi) ezinkundleni zokuxhumana.

Nangesikhathi esengenile umakoti esontweni, umphathi wohlelo umemezele ukuthi makungananyekwa ezinkundleni zokuxhumana, kwaze kwaba nguyena uKhuzani othi sekungananyekwa.

Abantu bebemagange ngokubona umakoti. Umshado ubulindeleke ukuba uqale ngo-11 ekuseni, waze waqala sekushaye u-15h00.

Ingqephu ibidla lubi, kugqokwe umbala omnyama.

Okuqaphelekile wukuthi umshado omhlophe bewuyimfihlo, kumenywe abantu abakhethekile.

ILANGA Lempelasonto lithole ukuthi ukufihlwa kukamakoti nangesikhathi kuqoshwa uhlelo olukhuluma ngempilo yalo mculi, bekwenzelwa ukuqhuba uhlelo lwempilo yakhe.

Umshado wesintu uzoqhubeka ngoMsombuluko eMandaba, eNkandla.
mthobisis@ilanganews.co.za

NGABANGANI bakamakoti. UNkz Senamile Ntuli, uNkz Sthabile Ngema, uNkz Nhlanhla Masondo noNkz Gamelihle Zulu.

BEBEBAHLE kanjena uZimiphi "Zimdollar" Biyela woKhozi FM, noMthobisi Sithole, oyintatheli yeLANGA.

BEZIWUQONDANISILE ukotini izinsizwa ebezihambele umshado kaKhuzani. 

INGQEPHU ibihamba phambili ezethamelini zomcimbi. NguLinda Mr Magic Sibiya noMaZulu we-Afro Soul.

NGABASHADIKAZI uKhuzani Mpungose nenkosikazi yakhe, uNonduduzo Mpungose, uKaMathenjwa.