Inkosi Yamagcokama nengonyuluka ngemicimbi yayo

Mthobisi Sithole 

UFISA ukukhula, angenise kwezinye izifundazwe ngekhono azicijela lona kwezomculo umculi kamaskandi, uScebi "Nkosi Yamagcokama" Dlamini.

Uveze lokhu echaza ngezinhlelo zomcimbi wakhe wokucula bukhoma (live concert), ozokuba ngoMgqibelo ntambama ePlayhouse, eThekwini.

Lo mculi uthi njengoba eqale uchungechunge lokuzikhulisa ngokwenza imicimbi yokucula bukhoma (Live), uhlose ukuba ngumculi osemncane, ozohamba phambili ngokucula bukhoma.

Uveze ukuthi uma esecijeke kahle, uzongenisa nakwezinye izinhlanga ezithanda umculo wakhe.

"Ngalokhu engikwenzayo, ngifuna ukuthuthuka ukuze ngivakashele namanye amazwe ngawo umculo," esho.

Uthi ngokwezinhlelo zakhe, ubefuna ukuwususa lo mcimbi ePlayhouse kulo nyaka ngenxa yobuncane bendawo. Uthi ukuhlela kwakhe sesihambile isikhathi, kuphazamise okuningi.

Uthi aseyaphela amathikithi, sekusele angaphansi kuka-30. Atholakala ePick 'n Pay naseWebtickets. Utshele ILANGA Lempelasonto ukuthi sekusele abiza u-R400 kuphela.

"Ngizodlala izingoma zami ezintsha, okuyizona eziphume ngoDisemba. Ngizimisele kakhulu ngokuthi umcimbi uhambele zonke izindawo, kodwa uma sengivuthiwe esifundazweni sethu (KwaZulu-Natal)," esho.

Umcimbi uzoqala ngo-6 ntambama, uvalwe ngo-12 ebusuku. Abanye abaculi abazozimazisa, kubalwa kubona uNtencane, uBahubhe, uMzukulu, uNjabulo Langa, uGatsheni namaYellow Bone. Lo mcimbi uqale ukwenzeka nyakenye ePlayhouse, kwathi kuNcwaba (August) kuwona lo nyaka, wabanjelwa eGoli.

UNgqongqoshe wezamaSiko namaCiko KwaZulu-Natal, uMnu Mtomuhle Khawula weseka lo mcimbi ngokuwuxhasa njengoba ethi ukhuthaza ukudlalwa bukhoma komculo nokugqamisa ubuciko. Uthi uzoweseka amaciko asafufusa nasematheni, ngenhloso yokutshala imbewu yalolusiko-mpilo.
mthobisis@ilanganews.co.za