Ezifingqiwe

01

SEKUMENYEZELWE ngokusemthethweni ukuthi iNingizimu Afrika kayizukuba yingxenye yamazwe azokwethamela umbuthano weG20, ngonyaka ozayo.

Lokhu kumenzeyelwe nguMengameli waseMelika, uMnu Donald Trump, esithangamini sabezindaba, eWashington DC, ngoLwesine.

UNgqongqoshe wezeMali eNingizimu Afrika, uMnu Enoch Godogwana, uthi yize izwe lingezukuba yingxenye yombuthano weG20, ozoba seMiami, eMelika, ngoNovember  ngonyaka ozayo, iNingizimu Afrika, iyoze yethamele iG20 ngo-2027, embuthanweni ozoba se-United Kingdom.

IMelika idubile ukwethamela umbuthano wabaholi be-G20, obuseGoli, ngoNovember, uMengameli uCyril Ramaphosa, awuchaze njengobe yimpumelelo.

IMelika ithi izomema izwe lasePoland, ukuba libe yingxenye ye-G20 yangonyaka ozayo, njengoba ichithe ukubakhona kweNingizimu Afrika.

02

ABAHOLI bohlaka olwaqokelwa ukubuyisela i-African National Congress (ANC), KwaZulu-Natal, batshelwe emakhaleni ukuthi bahlulekile ukwenza umsebenzi ababejutshelwe wona.

Lolu hlaka olunamalungu awu-66, luholwa nguMnu Jeff Radebe noMnu Mike Mabuyakhulu.
Belubekelwe izinyanga eziwu-9, ukuhlakaza izifunda, zibuye zakhiwe kabusha, kodwa kuthiwa lehlulekile. 

UNobhala-Jikelele we-ANC, uMnu Fikile Mbalula (osesithombeni esingenhla), uthi lolu hlaka luzoncishiswa njengoba belulibele wukulwa izimpi zangaphakathi, esikhundleni sokwenza umsebenzi olwaluqokelwe wona.

Izifunda ze-ANC ezahlakazwa eKZN, kazizange zibuye zivuselelwe ngenxa yemibango nezingxabano obekuqhubeka.

Okhethweni lwango-2024, iKZN neGauteng, balahlekelwa ngamavoti amaningi ngemuva kokuqubuka kweMK Party.

Lokhu kwaholela ekutheni izinhlaka zakhona zihlakazwe, kuqokwe ezesikhashana. 

03

IMEYA yeTheku, uMnu Cyril Xaba (osesithombeni esingenhla), uthi kayikho into azoyixoxisana noMnyango wezemiSebenzi yoMphakathi neNqalasizinda, KwaZulu-Natal, njengoba ukweleta izigidi zamarandi umasipala.

UMasipala weTheku uvale ugesi namanzi emabhilidini awu-30, alawulwa yilo mnyango, ngoba ugesi namanzi engawukhokhele.

UNgqongqoshe uMnu Martin Meyer, ucele umhlangano neMeya uXaba ukuze kuhlelwe ukuthi kuzokhokhelwana kanjani.

"Sifaka ingcindezi ebantwini nakosomabhizinisi ukuthi mabakhokhele izinto abazithola kumasipala njengamanzi nogesi, ekubeni uhulumeni wona usikweleta. 

"Kayikho into esizoxoxisana ngayo. Sifuna umnyango ukhokhe imali, sikwazi ukulungisa ingqalasizinda," esho.
UNgqongqoshe uMeyer, esithangamini sabezindaba eThekwini, ngoLwesithathu, uthe lezi zikweletu sekuyiminyaka ewu-30, zabakhona.

           04

UMNYANGO wezokuBusa ngokuBambisana nezoMdabu (COGTA), KwaZulu-Natal, usuqinisekisile ukuthi kutholwe isidumbu sowesifazane oneminyaka ewu-35, owaba yisisulu sezikhukhula.

Lona wesifazane ubecingwe izinsuku ezine, njengoba etholwe entanta emfuleni, eDundee, ngemuva kokukhukhulwa yimvula enamandla ngempelasonto.

Abanye abantu abathathu, ababa yizisulu zezikhukhu-la, batholwe eNew Hanover, ngesonto eledlule.

UNgqongqoshe wakwaCOGTA, esifundazweni, uMfundisi uThulasizwe Buthelezi (osesithombeni esingenhla), uthe imiphakathi mayiqikelele ukuthi ihlala ezindlini uma kunezimvula ezinamandla, ngoba kukhona ezilindelekile esifundazweni ngale mpelasonto.