Izitha neqhinga lokugila AmaBhokobhoko esango-2015

Sazi Mkhwanazi

ZIWATADISHE kahle AmaBhokobhoko izitha ezizobhekana nawo emdlalweni wokuqala weCastle Lager Outgoing Tour njengoba zizimisele ukuphinda ezakwenza ngo-2015, ziwaguqisa kwiNdebe yoMhlaba ye-IRB, eyayise-England.

AmaBhokobhoko azobhekana neJapan ngoMgqibelo ngo-18h00 eWembley Stadium, e-England, emdlalweni oyingxenye yochungechunge lwemidlalo ewu-5 yalolu hambo.

Umqeqeshi weJapan, u-Eddie Jones - onomlando ononile ekuqeqesheni, njengoba eke walolonga amaqembu esizwe abalwa nosondonzima embhoxweni, okuyi-England ne-Australia, kanti uke walolonga neDHL Stormers yaseWestern Cape - uthi iqembu elisuke lihlose ukunqoba uma libhekene namaBhokobhoko, kusuke kufanele libe bukhali ngendlela emangalisayo.

Uthi elakuleli livame ukusebenzisa amandla.

UJones usebuya ihlandla lesibili esigqikini sokulolonga iJapan njengoba kwakunguyena owayeyipheka ngesikhathi ihlula AmaBhokobhoko ngo-2015.

"Indlela iNingizimu Afrika edlala ngayo isobala. Uma ike yangena ku-30m womhlaba wenu, abadlali baphambili ababili bavele bagasele kanyekanye, lapho-ke uvele ubone ukuthi sekonakele - kusuke kufanele usebenzise ubuhlakani obedlulele ukuvimba lowo mnyakazo wayo," kusho uJones.

Uthi uma ibhola selingasekho kumaBhokobhoko, kusuke kufanele izitha zawo zilisebenzise ngobuchule "ngoba ayakuyeka uhlasele, kanti akucuphele umgoga. Nokho sizozama ukuwahlakaza wonke amaqhinga awo".

NGU-RUAN Nortje (okwesobunxele) no-Ox Nche (kwesokudla) belekelela uKobus Wiesse ophethe ibhola, ngesikhathi AmaBhokobhoko ebhekene ne-Italy eGqeberha nonyaka.

ISITHOMBE NGABE: BACKPAGEPIX

IJapan izobe igijima umdlalo wesine namaBhokobhoko selokhu kwathi nhlo.
Elakuleli lisanqobe emibili, lahlulwa kowodwa.

Kulo mdlalo wangoMgqibelo kuzobonakala okokuqala ngqa uZachary Porthen (21) weStormers oyi-prop (odlala unombolo 1 noma u-3) edlubhe ijezi lamaBhokobhoko.

 Emuva komdlalo weJapan, AmaBhokobhoko azobhekana neFrance mhla ka-8 kuNovember, i-Italy mhla ka-15, i-Ireland mhla ka-22 neWales mhla ka-29.

Selilonke iqembu lamaBhokobhoko elizobhekana neJapan, limi kanje:- (15) Cheslin Kolbe, (14) Ethan Hooker, (13) Jesse Kriel, (12) Damian de Allende, (11) Kurt-Lee Arendse, (10) Sacha Feinberg-Mngomezulu, (9) Cobus Reinach, (8) Jasper Wiese, (7) Franco Mostert, (6) Siya Kolisi (ukaputeni), (5) Lood de Jager, (4) RG Snyman, (3) Zachary Porthen, (2) Malcolm Marx, (1) Ox Nche.
Abasebhentshini: (16) Johan Grobbelaar, (17) Gerhard Steenekamp, (18) Wilco Louw, (19) Ruan Nortje, (20) Andre Esterhuizen, (21) Kwagga Smith, (22) Grant Williams, (23) Manie Libbok.

* Kuzo ezombhoxo, uJohn Plumtree uyashiya esigqikini esishisayo sokuqeqesha iHollywoodbets Sharks.

Ngokwesitatimende esikhishwe yiSharks, leli qembu livumelane ngomoya omuhle nalo mqeqeshi ukuba izindlela zehlukane. Nokho uzoqhubeka kuze kuphela isizini ka-2025/26.

"Yize kunjalo, izikhulu zeqembu nabadlali, bazoqhubeka bameseke uPlumtree, ukuze aqhubeke nokwakhela phezu kwesisekelo abesesakhile eqenjini. Uzothatha umsebenzi wokuba ngusomaqhinga," kusho isitatimende.