Isitshudeni saseDUT sinqobe phesheya kwezilwandle

Ifilimu yaso ilandisa kabanzi ngokusebenzisa amanzi njengesingathekiso sempilo, ubunzima nokuqala kabusha.

Thandi Zondi

WENZA ezibukwayo kumafilimu umfundi waseDurban University of Technology (DUT), uLindani Sibisi (26)  (osesithombeni esingenhla), waseNewcastle, onqobe indondo yeBest Mobile Film, Best Cinematography and Best Editing, emcimbini weMobile International Film Festival (CIMFF), obuseToronto, e-Ontario, eCanada.

Echaza uLindani ngomuzwa wokunqoba le ndondo ngefilimu esihloko sithi, Amanzi, uthe: "Bengingalindele ukuthi Amanzi angahamba ibanga elingaka, kangisayiphathi-ke eyokunqoba indondo yaphesheya kwezilwandle.

"Ukubona igama lami phakathi kwabanye abadidiyeli bamafilimu abavela emhlabeni wonke, kungenze ngakhumbula ukuthi kungani ngangena kulo mkhakha.

"Ukuwina le ndondo kakukho ngami kuphela, kepha kuyisiqinisekiso sokuthi izindaba zaseNingizimu Afrika ziyakwazi ukuncintisana nezinye, ezingeni lomhlaba," esho.

Ifilimu yakhe uthi ichaza kabanzi ngowesifazane ongenwe yimimoya yabangasekho, abafuna amukele ubizo njengomelaphi wendabuko.

Ilandisa kabanzi ngokushayisana phakathi kwenkolo yesimanje nobizo, kanti uLindani usebenzisa amanzi njengesingathekiso sempilo esichaza impilo, ubunzima nokuqala kabusha.

"Icebo liqhamuke ngokubuka amanzi, okuyinto ejwayelekile, kepha enamandla ngokwesintu nangokomoya.

"Imayelana nokulapheka, ukuxhumana nokuzithola kabusha. Bengifuna ababukeli baqonde ukuthi yini esiphilisayo, hhayi ngokomzimba nje kuphela, kepha nangokomoya," esho.

Uthi lo msebenzi uqhamuke ngokubambisana nethimba lakhe.  Nokufunda eDUT kwenze umehluko omkhulu empilweni yakhe.

"I-DUT inginike ithuba lokuhlola umsebenzi wami, ukuwufunda nokuqala okusha ngaphandle kokuba novalo. Uqeqesho nokucijwa kakusizanga ikhono lami nje kuphela, kepha kungenze ngakwazi ukuzithola.

"Ngifunde ukukwazi ukuzicabangela ngokujulile, nokuxoxa izindaba ngendlela efanele, okungenze ngaba ngusomafilimu enginguye namhlanje," esho.

Kulolu hambo uthi akufundile wukuthi udaba lomuntu ngamunye lubalulekile, ngisho ngabe uvelaphi.

"Ungalandeli okufikayo noma okushisayo ngaleso sikhathi, kodwa landela iqiniso. Izindaba zethu zicebile futhi zijulile, umhlaba ulangazelele ukuzizwa," esho.

Kumanje le nsizwa ithi imatasa nenye ifilimu emfushane.