Itwetwe ngo-100 000 wezitshudeni ezisengcupheni yokulahlekelwa
wuxhaso lweNSFAS

Isikhwama sishodelwa yimali ewu-R14 billion, ukuze kulekelelwe izitshudeni ngonyaka ozayo 

Thandoluhle Ngubo

ASELELE ehhovisi likamgcinimafa kazwelonke amathemba ngoxhaso lwezitshudeni ezihlomula esikhwameni iNational Student Financial Aids Scheme (Nsfas), ezingazithola zingaxhasiwe ngonyaka ozayo.

Lokhu kulandela isexwayiso esikhishwe yizikhulu zalesi sikhwama, eziveze ukuthi sishodelwa yimali elinganiselwa ku-R14 billion, engenza singakwazi ukuxhasa  izitshudeni ezilinganiselwa ku-100 000 ngonyaka ozayo.

Abakulesi sikhwama bathi kulindeleke ukuba ihovisi likamgcinimafa lethule isabelomali saphakathi nonyaka (mid-term budget) ngoNovember.

Kubikwa ukuthi lolu daba selusukunyelwe, njengoba sekunethimba lochwepheshe elihlanganise iminyango kahulumeni okubalwa owezemfundo ephakeme nokuqeqesha, ihhovisi likamengameli, ihhovisi likamgcinimafa kazwelonke, nabanye ukuba liphenye, bese liza nezisombululo zokuvimba isehlo esifana nalesi esikhathini esizayo.

Inyunyana yezitshudeni iSouth African Union of Students (Saus), izwakalise ukukhathazeka ngalesi sixwayiso.

Okhulumela iSaus uMnu Thato Masekoa, utshele leli phephandaba ukuthi bafuna ihhovisi likamgcinimafa kazwelonke lingenelele kulolu daba.

"Kuyaphazamisa ukuthi kukhona isexwayiso sokuthi izitshudeni ezingaphezu kuka-100 000, zingazithola zingaxhasiwe ngenxa yokungaphathwa ngendlela kwemali kwaNSFAS.

"Sifuna umgcinimafa kazwelonke alusukumele lolu daba, aqinisekise kwisabelomali saphakathi nonyaka. Ukulusukumela kwakhe, kuzoqinisekisa ukuthi kasikho isitshudeni esilahlekelwa yithuba lokufunda ngenxa yokungaxhaswa.

"Okunye esicabanga ukuthi kungaba wusizo, wukungenelela kwezinkampani ezinkulu, uhulumeni ungathembeli emalini yabakhokhi bentela kuphela, ukuqhuba ukusebenza kweNSFAS," esho.