Uphumela obala ngokwenama kwiPirates

U-Appollis uthi ugxile emsebenzini wakhe kwiBucs, eyase-Europe akayinakile

NGUMDLALI we-Orlando Pirates u-Oswin Appollis.

Senzo Sokhela

UPHUMELA obala ngokwenama anakho selokhu ejoyine i-Orlando Pirates ngasekuqaleni kwesizini edlule u-Oswin Appollis oyisiphekepheke somdlali wale kilabhu okuke kwavela ukuthi ulibhekisa e-Europe.

IBucs izobhekana neMilford FC kowokuvula imidlalo yeBetway Premiership ngoMgqibelo ngo-15h00 e-Orlando Amstel Arena, eSoweto. Isemkhankasweni wokuvikela izicoco ezintathu ezinqobe ngesizini edlule okungeseMTN8, iCarling Knockout neBetway Premiership.

U-Appollis, odlala esiswini kwiBucs, kuke kwavela ukuthi ufunwa ngamakilabhu ase-Europe. Bekubhekwe ukuthi kushaye lesi sikhathi engasabonwa kwiBucs njengoba edlale ingcwenga yebhola ngesizini edlule. Nokho kubukeka lo mdlali esazohlala njengoba indaba yakhe isithule.

Lo mdlali ebuzwa ngekusasa lakhe kwiBucs, u-Appollis uthe: "Njengamanje ngibhekene nomsebenzi wami wala kwiPirates, zonke lezi ezinye izinto ezikhulunywayo kangizinaki. Ngijabule selokhu ngijoyine iPirates. Ezinye izinto ezikhulunywa ngabezindaba ngiyazishalazela. Owami umsebenzi wukudlalela iPirates."

*Isiyonke imidlalo yeBetway Premiership engempelasonto iqhathwe kanje:-
NGOMGQIBELO
EKing Zwelithini Stadium: Golden Arrows vs Chippa United 15h00.
E-Orlando Amstel Arena: Orlando Pirates vs Milford FC 15h00.
ESugar Ray Xulu Stadium: Stellenbosch vs AmaZulu 15h00.
ESeshego Stadium: Sekhukhune United vs Durban City 17h30.
EMbombela Stadium: Kruger United vs Kaizer Chiefs 20h00.
NGESONTO
ERichards Bay Stadium: Richards Bay vs Polokwane City 15h00.
EToyota Stadium: Siwelele vs TS Galaxy 17h30.