OwaseLesotho ujabulela ukuba yingxenye yeTWR

Kulindeleke izinkumbi emjahweni wabesifazane ogijinywa emadolobheni amathathu

Mzwamandla Zondi

KULINDELEKE abasubathi abangaphezulu kuka-28000 kwiTotalsports Women's Race (TWR) 10km ezogijinywa emadolobheni amathathu amakhulu akuleli. Umjaho wokuqala uzokuba ngeSonto eThekwini, ulandelwe ngozokuba ngoSuku Lwabesifazane okuyiSonto elizayo lomhla ka-9 ku-August, eCape Town, kusongwe ngowaseGoli ozokuba mhla ka-16.

Lo mjaho wabesifazane bodwa, usanda kuthola abaxhasi abasha kungena abakwa-Absa - bodumo lwe-Absa Run Your City egijinywa emadolobheni amakhulu ayisithupha aseNingizimu Afrika okuyiGqeberha, iCape Town, iTheku, iGoli, iTshwane neMangaung ezosingatha lo mjaho okokuqala nonyaka. IMangaung imenyezelwe ngabakwaStillwater Sports abasabalalisa i-Absa Run Your City ngoLwesithathu.

NGUNEHENG Khatala osubathela iHollywood Athletic Club.

Okuphawulekayo ngeTWR wukuthi yonke imingenelo yawo isigcwele. Kulo mjaho waseThekwini ongeSonto kubhekwe ngabomvu uNeheng Khatala waseLesotho ukuba azidlele amahlanga kuwona njengoba ezokube engekho uzakwabo uTayla Kavanagh weHollywood Athletics Club oyingxenye yamaCommonwealth Games aqhubekayo eScotland.

UKhatala - ophethe irekhodi lezwe lakhe kuleli banga - uthe: "Ukugijima kuyasihlanganisa, kungakhathalekile ukuthi uphumaphi. Kuyangijabulisa ukuba yingxenye yeTWR ekubeni ngingumgijimi waseLesotho. Lo mjaho uletha ubumbano kwabesifazane nokuzethemba kithina sisodwa.

"Ngizogijima ngendlela engihlele ngayo. Nginethemba lokuthi ngizogijima kahle kakhulu kulo mjaho. Ngingakuthokozela ukunqoba noma ukungena nabokuqala abathathu."

AbakwaStillwater Sports bathe bafisela uNeheng umjaho omuhle ngeSonto. Ngonyaka odlule lo msubathi wangena unombolo 4 kulo mjaho owanqotshwa nguChristine Njoki waseKenya. Nonyaka ungene isithathu kwiSpar Women's Challenge, eThekwini.