NGUNGQONGQOSHE wezemiDlalo uGayton McKenzie.

UMcKenzie uhambe wayokhankasela imidlalo 

Mzwamanda Zondi

UMENGAMELI obambile we-Athletics South Africa (ASA) uJohn Mathane udinwe uyaqhuma yisenzo sikaNgqongqoshe wezemiDlalo kazwelonke uGayton McKenzie, sokuya eMonaco, eFrance, ayokhankasela ukuthi iNingizimu Afrika isingathe umqhudelwano weTrack and Field, ekubeni engabazisanga bona.

UMathane, obambele uJames Moloi omiselwe ukungaziphathi kahle nokunye, ubekhuluma nabezindaba mayelana nodaba lwabasubathi bamajuniya baka-U/20 abaya emqhudelwaneni we-U/20 World Championships ozoqala ngoMgqibelo e-Oregon, e-United States of America (USA).

NGUMENGAMELI obambile we-Athletics South Africa, uJohn Mathane.

Kuzokhumbuleka ukuthi abasubathi abaya kulo mqhudelwano kuthiwe mabazihlanganisele bona izindleko zokuya eMelika. UMathane uthe kukhona uxhaso alutholile ukusiza laba basubathi kanti kalwanele, ubelindele isibonelelo sikahulumeni obekufanele singene ekupheleni kukaJune. UMathane uthe uthenjiswe ukuthi imali ephuma kuhulumeni izongena ngaphambi kokuba abasubathi bahambe.

"Inkinga esibhekene nayo wukuthi abantu baseNingizimu Afrika bayakhohlwa wukuthi ezokugijima yizona eziletha izindondo kuleli. Ungqongqoshe uyazi ukuthi sinenkinga yokuhambisa izingane e-Oregon kodwa akakaze enze imizamo yokusiza. Kweminye imidlalo simbona ehamba phambili. Ngiphoxekile ngendlela asebenza ngayo, wenza izinto engaxhumananga nathi.

"Ngizwa kuthiwa ubehambile eseMonaco, eyokhankasela izwe ukuba lisingathe imidlalo yeTrack and Field engasazisanga thina esiphethe ezokugijima. Ngisho isikhulu esikhulu kasinalwazi ngalo mqhudelwano afuna ukuwuletha kuleli. Le nto ayenzayo wukusedelela okuphindiwe. Ngiyafisa ukuba angithinte ngizomtshela ukuthi le nto ayenzayo kasiyithandi futhi uwukusedelela ukuthi afune ukusihlelela imidlalo singazi, sibe sikhona siphethe ezokugijima. Ngifuna eze lapha ezoxolisa," kusho uMathane.

Kushone usuku lwangoLwesine kungakacaci ukuthi kuqhubekani ngabasubathi abaye e-Oregon.