NGU-KGOTSO Masangane ogijima kwiMidlands Wanderers.

ISITHOMBE NGABE: BACKPAGEPIX

Mfanafuthi Ndlovu

UVEZA eyokushisa kwensimbi kwiMotsepe Foundation Championship (MFC) umdlali obeyibambe emakilabhini ahlukene ase-Europe, osedlala kwiMidlands Wanderers.

IWanderers izobhekana neThe Bees FC koweMFC ngoMgqibelo ngo-15h30 KaNyamazane Stadium, eMpumalanga.

UKgotso Masangane - ojoyine iMidlands ngasekuqaleni kwesizini, emuva kokudlala iminyaka embalwa eSweden naseLatvia - utshele ILANGA Lempelasonto ukuthi sinzima lesi sigaba abakusona. Uthe kugijinywa kusuka umdlalo uqala kuze kube uyaphela.
Uthe bakuqonda kahle ukuthi umdlalo wabo neThe Bees ngeke ubelula kwazise nayo idonsa kanzima emidlalweni yeligi, ngakho izofuna ukuvuka ngabo njengoba izokube isesibayeni sayo.

Nokho uthi bazozama ngawo wonke amandla ukulwela ukubuya nawo wonke amaphuzu alo mdlalo.

NGUMASANGANE exinwe nguLyle Lakay weHope FC.

ISITHOMBE NGABE: BACKPAGEPIX

Uthe inhloso yakhe enkulu wukufika noshintsho olubonakalayo kule kilabhu okuqale isizini izimisele ngokunqoba lesi sigaba ukuze yenyukele kwiBetway Premiership nokho osekubukeka sekuzokuba nzima ukwenzeka ngendlela ewalahla ngayo amaphuzu ekhaya nasekuhambeni.

"Kuningi umuntu asazama ukuzijwayeza khona ngebhola laseNingizimu Afrika, kodwa-ke ngingasho ukuthi konke kusahamba kahle okwamanje, ngiyakwejwayela nokuba sekhempini yekilabhu," esho.

US'the Hlongwane oyimenenja yeMidlands uthi bayakuqonda ukuthi iThe Bees ihlezi ibanika inkinga. Uthi balindele umdlalo onzima njengoba icijwa nguJoel Masutha abamhloniphayo.

* Isiyonke imidlalo yeMFC imi kanje:-
NGOLWESIHLANU
ESolomon Mahlangu: Real Natives vs North West University 15h30.
E-Olympia Park: Orbit College vs Venda FC 19h30.
NGOMGQIBELO
EMalamulele: Gomora United vs Hope FC 15h30.
EMxolisi Dicky: Hungry Lions vs Upington City 15h30.
EDobsonville: Lerumo Lions vs University of Pretoria 15h30.
KaNyamazane: The Bees vs Midlands Wanderers 15h30.
NGESONTO
ENelson Mandela University: Highbury FC vs Leicesterford City 15h30.
E-Athlone Stadium: Cape Town City vs Magesi FC 15h30.