Ibhekene ngqo nezimbangi zayo
iHaval 7 entsha

AbakwaHaval benze konke okusemandleni ukubuyisa isithunzi sabo

UYENYUKELA umbango nomqhudelwano wezimoto eziyimikhiqizo yase-China, njengoba i-Haval 7 entsha, inezimpawu ezikukhumbuza i-Jetour T2.

Umqhudelwano wezimoto ezingama-SUV, ube sobala ngesikhathi abakwa-GWM bethula i-Haval 7 entsha, eza nokuningi okuthe thuthu, iphinde ibe nesakhiwo esifanayo ne-Jetour T2 enesasasa kubathengi.

Kuningi okuhlukile nge-H7 entsha uma uqhathanisa nendala, esike sayihlaziya kuleli khasi ngonyaka odlule.

Le SUV inesakhiwo esisabhokisi, kanti ithe ukuqoqeka uma uyiqhathanisa neyaphambilini,  eyayinobuhixihixi obuningi kwezobuchwepheshe, ukushayeleka kwayo nendlela eyayakheke ngayo.

Kucacile ukuthi abakwa-GWM ngale Haval H7 entsha, benze konke ukubuyisa isithunzi sabo, ikakhulukazi njengoba ingadayisanga nakahle eyaphambilini.

Emcimbini okhethekile wezintatheli obungeledlule, othathe izinsuku ezimbili, obuhambisana nokushayelwa kwezimoto, osukele esikhumulweni sezindiza eKapa, waya edolobhaneni eSomerset West, izikhulu bezinenkulumo ekhethekile, echaza ngalolu hlobo olusha lweHaval.

Isikhulu esiphezulu, uMnu Conrad Groenewald, sibikele izintatheli ukuthi i-H7 entsha, ikhishwe yaba nezinhlobo eziwu-6. Ihlukaniswe ngekaphethiloli nehamba ngogesi. Ngalokhu benzela ukufinyelela ohlotsheni lwabashayeli olwehlukene, nangokuhambisana nephakethe labo.

Ekhuluma ngohambo lwe-H7, olufike nezinguquko eziningi, uthe kubize ukuba babuyekeze imibiko nemibono nge-H7 endala, eyethulwa eminyakeni engaphansi kwemibili edlule.

“Ithimba lonjiniyela lenze ucwaningo nokubuyekezwa okungaphezulu kuka-230, ukuze siqinisekise ukuphepha, ubuchwepheshe, nokwakheka kwayo ukuze umshayeli aneliseke.”

Bathe nge-H7 entsha bazimisele ngokuheha abashayeli abazethembayo nabaphokophele inqubekela phambili, abangasabi ukugqama esixukwini.

Uhambo ngama-H7 amasha, lusukele eSomerset West, lagudla amajika aseCaledon, izintaba
zaseDassiesfontein, nalapho sithole ukuzishayela obhuqwini nasematsheni.

Emuva kwesidlo sasemini eHermanus, sibe sesibuyela edolobheni laseKapa nalapho sigobe khona amadlangala.

Kuwona wonke lo mjikelezo, sithole ithuba lokushayela zonke izinhlobo ze-H7, obekuyi-2.0T Ultra, iLuxury ewu-4x4, i-1.5T HEV Super Luxury 4x2 ne-1.5T PHEV Ultra Luxury 4x4.

Kuzona zonke lezi zinhlobo, ubuwuzwa zisuka umehluko, okwenze wabona ukuthi yikuphi lapho bethathe khona amathuba okuncintisana nezimbangi zabo.

Abakwa-GWM baphinde bakuqinisekisa nokuthi abathengi sebengavakashela amagalaji abo, ukuyofaka ama-oda njengoba lezi zimoto seziyatholakala. Amanani azo asukela ku-R554 900 kuya ku-R794 900.

Kucacile ukuthi nakuba i-Jetour isidlile isicoco njengemoto yonyaka ka-2026, izimbangi ezifana
ne-Haval, nazo zisakugaqele ukuwudla umhlangani- so, sekusele kumthengi nangendlela lezi zimoto ezizoziphatha ngayo emgwaqweni.