Kawulubhadanga enkantolo umndeni wekhansela okubhuntshe umngcwabo walo 

WUMNDENI wakwaSibiya ovunwe yinkantolo ukungcwaba umakoti wawo uNkk Princess Sebenzile Sibiya (uMaMthembu).

Skhosiphi Mthembu

KAWULUBHADANGA enkantolo umndeni wekhansela okubhuntshe umngcwabo walo ngeledlule ngoMgqibelo, ngenxa yombango wesidumbu obuphakathi kwemindeni emibili - okamufi nowomyeni wakhe.

Umndeni wakwaMthembu, lapho kuzalwa khona uNkk Princess Sebenzile Sibiya, obeyikhansela le-IFP ngaphansi koMasipala waKwaDukuza, kawufikanga eNkantolo eNkulu yaseThekwini izolo ngoLwesine, njengoba bekumele kulalelwe icala elifakwe wumndeni womyeni. Lokhu kugcine kuphoqa ukuba inkantolo inikeze igunya lokungcwaba umndeni wakwaSibiya.

ILANGA ngoMsombuluko libike kabanzi ngalolu daba, kulandela ukubhuntsha komngcwabo kaNkk Sibiya obuhlelelwe uMgqibelo odlule. Umndeni wakwaMthembu ubufuna ukuzingcwabela umufi, njengoba umyeni wakhe sewashona.

Ngakolunye uhlangothi, umndeni wakwaSibiya lapho kuzalwa khona umkhwenyana kamufi, ubufuna ukuba angcwatshwe eGingindlovu, emzini wakhe nomyeni wakhe, owashona ngo-2021.

YITHUNA lomyeni kaNkk Princess Sebenzile Sibiya (uMaMthembu), umndeni ofuna ukuthi umufi angcwatshwe eduze kwalo.

Umndeni wakwaMthembu uhlele yonke into, okuthe ngosuku obekumele angcwatshwe ngalo, isidumbu sangafika kulandela ukuba umndeni wakwaSibiya ufake amaphepha enkantolo, amisa umngcwabo.

Inkonzo iqhubekile ngoMgqibelo singekho isidumbu. UMnu Thokozani Vilakazi, ongumshana kwaSibiya, uthe bewumdeni bajabule ngesinqumo senkantolo njengoba sebezozingcwabela isidumbu sikamalumekazi wabo.

"Singumndeni sivumelene ngokuthi umalumekazi sizomfihla eceleni kukamalume ngoMgqibelo ozayo mhla ka-7 kuJuni, ekhaya eMabhokweni, eGingindlovu," esho.

Uthe bengumndeni wakwaSibiya kabalwi nomndeni wakwaMthembu, kodwa bebefuna umalumekazi wabo angcwatshwe eduze komyeni wakhe.