KUBE yinjabulo kubadlali beChelsea yaseNgilandi inqoba inkomishi ye-Uefa Conference League ngemuva kokudla iReal Betis yaseSpain.

UKUFANISA nesiqalo esisha lokhu okwenziwe ngabadlali bakhe u-Enzo Maresca oqeqeshi
iChelsea yase-England ejikele esiswini njengotshwala iReal Betis yase-Spain iyehlula ngo-4-1 kowamanqamu we-UefaConference League ngoLwesithathu ebusuku eWroclaw, ePoland.

Ziye ekhefini iBetis ihamba phambili, kodwa izinto zajika njengoba kugcine kukhonya iBlues.

NGU-JADON Sancho weChelsea ejabulela elinye lamagoli akhe bedla iReal Betis ngo-4-1 kowamanqamu we-Uefa Conference League.

Ngokunqoba lomqhudelwano, iChelsea ibe yikilabhu yokuqala ukunqoba yonke imiqhudelwano yamakilabhu ase-Europe njengoba seyake yanqoba iChampions League kabili, i-Europa Cup, neSuper Cup.

Lena bekuyindebe yokuqala kwiChelsea selokhu yatakulwa yiziqumama zaseMelika ziyithenga
kuRoman Abramovich waseRusssia ngo-2022.

Lokho kwakulandela izinsolo ezabhixa lesi sikhulu saseRussia ngenxa yempi yezwe laso ne-Ukraine, egcine idlula nenqwaba yemiphefumulo.

NGUMQEQESHI weChelsea u-Enzo Maresca.

"Lokhu ngikufanisa nesiqalo esisha ekilabhini. Sisanda kuqeda endaweni yesine kule sizini, manje sesinqobe umqhudelwano ofana nalona.

"Abaxhasi bafake izindodla zemali ekilabhini ngakho kubafanele ukuzuza lokhu abakutholile ekugcineni," kusho lo mqeqeshi owenze umsebenzi omuhle kwiBlues ebuyisa injabulo kubalandeli bale kilabhu.