Uthweswe umqhele uDJ waseThekwini oqokwe kumaBET 

NguDJ Thukzin ogama lakhe langempela nguThuthuka Wandile Zindlovu, waseLamontville ethweswa yiMeya yeTheku uMnu Cyril Xaba umqhele wokumfisela okuhle kodwa njengoba eqokwe kumaBET Awards.

Lucky Cain

IMEYA kaMasipala weTheku uMnu Cyril Xaba, ihalalisele, yafisela uDJ Thukzin okumhlophe
kodwa njengoba eqokwe emcimbini wokuklomelisa womhlaba weBET Awards, ozoba sePeacock  Theatre, eLos Angeles, eCarlifornia ngomhla ka-9 kuJuni 2025.

 Kulo mcimbini ohlanganisa nabaculi bakwamanye amazwe uThukzin, ogama lakhe langempela nguThuthuka Wandile Zindlovu odabuka eLamontville, uqokwe ngaphansi komunxa weBest New International Act.

UThukzin uhlangane noXaba ehhovisi lakhe ngoLwesithathu, ukuyothola izibusiso zemeya ngokuqokwa kwakhe kulo mcimbi obalwa nemikhulu emhlabeni.

 UXaba uhalalisele uThukzin ngokumthwesa umqhele oyinkomba yokumchoma uphaphe lwegwalagwala ngempumelelo yakhe emculweni. Lo DJ naye ubonge ithuba lokuhlangana nemeya, waphinde wazibongela nangokuqokwa kulo mcimbi.

Uthe ukuqokwa kwakhe kuyamkhuthaza ukuba aqhubeke njalo nokwenza into ayithandayo nayizwa egazini. Ubonge ukwesekwa akuthola eThekwini namaphethelo, naseNingizimu Afrika yonkana njengoba konke akwenzayo kuqala kuleli ngaphambi kokuthi kuze kubonwe ngaphandle.

UThukzin uqhathwe nezinye izihlabani zakwamanye amazwe emunxeni weBest New International Act, okubalwa kuzo uShalipopi,
u-Ajuliacosta, uMerveille, uMaglera Doe Boy, uKWN, u-Abby Chams, uTxC, u-Odeal, uDr Yaro no-Amabbi.

UThukzin akayena umculi wokuqala ukuqokwa kulo munxa kulo mcimbi, njengoba ngo-2016 uBlack Coffee waba ngowokuqala odabuka kuleli ukunqoba kulo munxa, kwabe sekulandela abanye okubalwa kubo uSjava owayinqoba, noSho Madjozi owayinqoba ngo-2019. UBabes Wodumo, uNasty C noMakhadzi bake baqokwa, kodwa babuya belambatha.