Ezinoju kubagijimi ngemiklomelo yeTwo Oceans

Imali ezotholwa yizingqwele yenyuswe ngo-R130k

Mzwamandla Zondi

ZINOJU kubasubathi izindaba zokwenyuswa kwemiklomelo yeTotalsports Two Oceans Ultra Marathon ezokuba ngoMgqibelo womhla ka-11 ku-April eCape Town.

Imali ezobangwa ngabasubathi kulo mjaho owu-56km - iwu-R2.6 million kanti izingqwele zizogoduka no-R380 000 ngokwahlukana kobulili, kwehle njalo kuze kufike kwabazongena endaweni yeshumi abazothola u-R12 000. Nyakenye izingqwele zalo mjaho zigoduke no-R250 000.

NGU-GERDA Steyn osenqobe iTwo Ocean Marathon amahlandla ayisithupha kulandelana.

Isiyonke imali ebekelwe abasubathi be-Ultra wu-R2.1 million. Lo mjaho uzokube uhambisana neHalf Marathon ezokuba ngeSonto mhla ka-12. Abasubathi beHalf Marathon babekelwe imali ewu-R422 600. Abazonqoba bazothola u-R50 000 ngokwahlukana kobulili.

Kubhekwe uGerda Steyn – osubathela iHollywood Athletics Club – ukuba aqhubeke nokuchanasa kulo mjaho njengoba esewunqobe amahlandla ayisithupha kulandelana.

Kwabesilisa kubhekwe u-Onalenna Khonkhobe weNedbank Running Club – oke wawunqoba lo mjaho phambilini. Omunye obhekiwe yingqwele yanyakenye uKhoarahlane Seutloali waseLesotho oyingqwele yanyakenye noSiboniso Skhakhane waKwaZulu-Natal ongene isibili kodlule.

NGU-OLALENNA Khonkhobe okubhekwe ukuba enze kahle kwiTwo Oceans yalo nyaka.

USeutloali ube nonyaka omuhle nyakenye njengoba enqobe iSoweto Marathon, waphinda wenza kahle nakweminye imijaho. ITwo Oceans ingomunye wemijaho emikhulu kuleli njengoba ilandela iComrades Marathon.

Kungena eleComrades nje, lo mjaho uzokuba ngeSonto lomhla ka-14 kuJune usukela eThekwini usongwe eMgungundlovu.