LAPHA abosizo lokuqala bathwale kanzima emuva kwenhlekelele yengozi eyenzeke eLotus Park, eThekwini, edlule nemiphefumulo yabantu.
Izithombe ngu: John Hlongwa

'Iyisibozi' iloli ebhubhise abawu-11 etekisini

Kusolwa ukuthi iloli belingekho esimeni sokuba semgwaqweni, kanti netekisi kuthiwa belilayishe ngokweqile

Thandoluhle Ngubo

KUSOLWA izinkinga zokungalungiseki ngendlela (mechenical failure) kwiloli elibandakanyeke engozini netekisi, kwashona abawu-11, okuhlanganisa nomfundi okuthiwa uneminyaka elinganiselwa ku-13, eLotus Park, eThekwini, ngoLwesine ekuseni.

Lokhu kuvezwe yizinhlaka zokuphepha emgwaqweni namanye amalungu omphakathi afike kuqala endaweni yesigameko.

Ilungu lomphakathi ebelidlula ngendlela, elingathandanga ukudalulwa, litshele leli phephandaba ukuthi belisendleleni eya emsebenzini ngesikhathi kwenzeka le ngozi.

Lithi kuphoqe ukuba umshayeli weloli athathwe ngamaphoyisa njengoba amanye amalungu omphakathi abesho ukumqeda.

LAPHA abezimo eziphuthumayo bebetakula izidumbu emuva kokuba iloli ifahlaze  itekisi.

"Bekusanda kushaya u-07:30 kubheke ku-08:00 ekuseni ngesikhathi kwenzeka le nhlekelele.
Iloli ebeyihamba ngomgwaqo obheke ngasedolo-bheni ishayise itekisi ebeyiphuma ngaseSiphingo.

"Uma sesithola-ke, itekisi beyiya eLovu. Sisola ukuthi ibe nenkinga yamabhuleki (iloli) njengoba ivele yaphenduka ngekhanda (jackknife) yashayisa itekisi, yayibeka phezulu.

"Itekisi ibe seyiphusheleka esihlahleni, yacindezelwa yiloli ngaphambili. Sizamile ukusiza nabanye abebekhona ngesikhathi kwehla lesi sehlo, kodwa kucaca nje ukuthi sisiza abantu asebethule.
"Sithi dudu nasemindenini elahlekelwe," esho.

LISALE lifahlake kanjena itekisi elishayiswe yiloli lilayishe abantu, kwaphangalala abawu-11.

UNgqongqoshe wezokuThutha KwaZulu-Natal, uMnu Siboniso Duma, uhambele kule ndawo.
Uthi imibiko abayitholile wukuthi netekisi beyilayishe ngokweqile, njengoba beyinabantu abawu-18.

"Esikutholayo wukuthi itekisi beyiphuma erenki eSiphingo, ibheke ngaseLovu. Okusikhathazayo wukuthi njengoba beyilayishe ngokweqile, iphume kanjani erenki. Impendulo esiyinikwe ngababheke umsebenzi, wukuthi kungenzeka ukuthi itekisi beyihamba icosha abagibeli endleleni.

"Sizolinda uphenyo, lucacise ukuthi kwenzekeni. Esikubonile nje wukuthi amasondo eloli ayizimpa-ndla wonke, kawekho esimweni sokuba semgwaqweni," esho.

UDuma uthe okwamanje imindeni yabashonile beyingakatholakali, kodwa bazokwenza isiqiniseko sokuthi iyatholakala. Uthi bazovakashela nabasindile ezibhedlela, ukuthola ubuqiniso bokwenzekile.

Ugxeke isenzo sezinkampani zabosizo lokuqala lokungahlinzeki ngosizo lokuqala abantu abangenayo iMedical Aid, uma izisebenzi (zalezi zinkampani) zifika endaweni yesigameko

"Sizobambisana nezinhlaka ezifanele ezifana neSantaco, ukuqinisekisa ukuthi kuyatholakala ukuthi itekisi iphume kanjani erenke nesibalo eseqile.

"Kungiphatha kabi ukuthi kunezinkampani ezizimele ezithi uma zifike kuqala endaweni yesigameko, zenze uphenyo ngezisulu ezine-Medical Aid nezingenayo, bese zilekelela laba abanayo kuphela.

"Kuyisenzo esingemukelekile leso ngoba sikholwa wukuthi wonke umuntu kumele ahlinzekwe ngosizo lwempilo ezimweni ezifana nalezi," esho.