Ubona iBafana izoqopha umlando kwiNdebe yoMhlaba

Mfanafuthi Ndlovu
 
UNEQHOLO lokuzuza okungakaze kwenzeke kwiBafana Bafana, ngokudlulela esigabeni somkhumulajezi kwiNdebe yoMhlaba yeFifa uHugo Broos ongumqeqeshi waleli qembu lesizwe likanobhutshuzwayo laseNingizimu Afrika.

IBafana ididiyelwe kuGroup A kulo mqhudelwano ozodlalelwa eCanada, eMexico nase-United States of America (USA) ngokuhlanganyela.

Kuleli qoqo ineMexico - ezovula nayo ngomhla ka-11 kuJune - ilandele ngeCzechia ngomhla ka-18, ivale neSouth Korea ngomhla ka-25.

NGU-HUGO Broos ongumqeqeshi weBafana.

ISITHOMBE NGABE: BACKPAGEPIX

IBafana izozifudumezela lo mqhudelwano ngokugadulisana neNicaragua yaseCentral America ngoLwesihlanu ngo-18h00 e-Orlando Amstel Arena, eSoweto.

Amathikithi alo mdlalo abiza u-R80 abadala, no-R40 izingane eTicketPro.

Emuva kwalo mdlalo iBafana izobhekisa amabombo eMexico.

"Ngineqholo elikhulu lokuthi sizokwazi ukudlulela esigabeni esilandelayo somkhumulajezi okokuqala ngqa emlandweni weBafana. Ngiyabethemba abadlali bami. Nokho nenhlanhla sizoyidinga kule midlalo," esho.

Uthi kuyamjabulisa ukubophela esikwatini sakhe abadlali abasanda kunqoba izicoco ezimqoka; okungabeMamelodi Sundowns - esanda kugcotshwa njengezingqwele zeCaf Champions League - nabe-Orlando Pirates abanqobe i-treble kule sizini.

Uthi nokuba khona kwabadlali abayibamba phesheya kuhle ngoba kwandisa isipiliyoni esimqoka kuleli qembu.

UBroos uphupha ngalo mlando nje, iMorocco yagila izimanga kwiNdebe yoMhlaba edlule, ka-2022, eQatar, ngokuba yizwe lokuqala lase-Afrika ukufinyelela kuma-semi final alo mqhudelwano ongomkhulukazi emhlabeni.