Owe-Arrows nomyalezo oshubile kwiChiefs

Senzo Sokhela

UTHUMELA umyalezo oshubile kwiKaizer Chiefs uJunior Sede Dion ongumgadli weLamontville Golden Arrows ongalibheki ipali kulezi zinsuku.

I-Arrows izokwamukela iChiefs koweBetway Premiership ngoMgqibelo ngo-17h30 eMoses Mabhida Stadium, eThekwini.

Iya kulo mdlalo nje, iguqise iMagesi FC ngo-2-1 koweBetway Premiership ngoLwesithathu ebusuku eKing Zwelithini Stadium, eMlazi.

Amagoli ayo ashaywe nguDion noNqobeko Dlamini, kwathi eleMagesi labhakuziswa nguMcedi Vandala.

U-INACIO Miguel oyisitobha seChiefs, nonozinti wakhe uBrandon Peterson, bamelwe wumsebenzi wokuphunga amafolosi e-Arrows njengoba benze kuLebo Mothiba weMamelodi Sundowns.

ISITHOMBE NGABE: BACKPAGEPIX

UDion - ovutha engabaselwe kulezi zinsuku - njengoba eseshayele i-Arrows amagoli amathathu emidlalweni emithathu asayigijimile - uthi iChiefs kufanele izibambe ziqine  njengoba iya eMoses Mabhida.

"Ukunqoba kwethu iMagesi kwenyuse ukuzethemba njengoba siya kulo mdlalo weChiefs.

"Ngeke ube lula, kodwa okufanele ikwazi wukuthi amaphuzu amathathu azosala lapha ekhaya.

"Inhloso yethu vele wukuthi sephule lo mgqigqo wayo njengoba ingakaze yehlulwe selokhu kuqale le sizini. Sifuna ukwenza isiqiniseko sokuthi kuyaphela ngaleli rekhodi layo," kusho uDion.

Lo mdlali ubukeka ezelwe kabusha ngaphansi kobuholi bukaManqoba Mngqithi ongumqeqeshi we-Arrows nje, ubekade esemabhukwini AmaZulu FC, abemebolekise kwiMarumo Gallants ngesizini edlule. 

Amathikithi omdlalo we-Arrows neChiefs abiza u-R80 eComputickets, kanti kuthiwa ahambisa okwamakhekhe ashisayo emakethe.