Umnyango ugculisekile ngohlelo lokushintsha amaNumber Plates eKZN

Mthokozisi  Dlomo

UMNYANGO wezokuThutha nokuHlaliswa kwaBantu KwaZulu-Natal, uthi ujabule ngendlela abashayeli bakulesi sifundazwe abasukumele phezulu ngayo uma uhlaba ikhwelo lokuthi kushintshelwe kumaNumber Plate amasha.

Lo mnyango uthi kusukela kumenyezelwe isinqumo sokushintshwa kwama Number Plate ngoDisemba ka-2023, zingabalelwa ku-1.7 million izimoto ezindala esezishintshelwe kwamasha, njengoba uthi ububhalisa ezilinganiselwa ku-60 000 ngenyanga.

 NguMnu Sipho Hlomuka noNkk Nomusa Dube-Ncube owayengundunankulu waseKZN ngesikhathi kwethulwa uhlelo olusha lwama-number plates.

Usuku lwangeSonto ngelomnqamula-juqu lokushintsha amapuleti, okusho ukuthi ozotholakala esashayela ngelidala ngoMsombuluko, usengcupheni yokubhekana nengalo yomthetho.

Umnyango uthi isibalo sezimoto ezibhalisiwe kulesi sifundazwe ziwu- 782 839, kanti ziwu-76 774 ezingagunyaziwe ukuba emgwaqweni.

"Izizathu zokungabhaliswa kwezimoto, kungaba yizinto ezehlukene njengobudedengu babanikazi, izimoto ezingasasebenzi kodwa ezingacishiwe emabhukwini kahulumeni, nokunye."

NgoDisemba ka-2023 umnyango wethula uhlelo lwama-number plates amasha KwaZulu-Natal, njengoba bewufuna uhlelo lwamapuleti lwakulesi sifundazwe luhambisane nolukazwelonke.

Kusukela lapho, izimoto ezintsha bese ziphuma nama-number plates amasha, kwathi labo abanezimoto ezindala banikwa ithuba lokushintsha uma beyozithelela.

Umnyango uthe kazikho izinhlelo zokuhlehlisa umnqamlajuqu wokushintsha ama-number plate ngoba, ukholelwa ekutheni abantu banikwe isikhathi esanele sokushintsha.