Ubukela kuMosimane umqeqeshi weGomora FC

NGU-PATRICK Phungwayo.

ISITHOMBE NGABE: BACKPAGEPIX

Mfanafuthi Ndlovu
 
UDALULE ukuthi usizwa wukubukela kuPitso "Jingles" Mosimane - ongumqeqeshi osemnkantshubomvu kulo mkhakha -  uPatrick Phungwayo ongumlolongi weGomora United, ezovovana inkani neVenda FC koweMotsepe Foundation Championship (MFC) ngoLwesihlanu ngo-15h00 eMalamulele Stadium, eLimpopo.

UPhungwayo utshele abezindaba ukuthi ukhule ebukela kuMosimane, owaqala kancane kulo msebenzi njengoba namuhla esefana nengwevu kuwona, okufakazelwa wukuthi usezuze okuningi kuwona; kubalwa neCaf Champions League ayinqobe kathathu namakilabhu ahlukene.

Uyinqobe kanye neMamelodi Sundowns, wayiqukula kabili ne-Al Ahly yaseGibhithe. Uthishwa ukuthatha umsebenzi wokulolonga iBafana Bafana.

NGU-PITSO Mosimane.

ISITHOMBE NGABE: BACKPAGEPIX

UPhungwayo uthe ubengakulindele ukunikwa isikhundla sokuqeqesha kule kilabhu njengoba ebeyiphini lika-Ashley Makhanya othole amadlelo aluhlaza kwiLamontville Golden Arrows egijima kwiBetway Premiership.

"Ngikhule ngithanda izinselelo ezintsha empilweni. Okungijabulisayo wukuthi siqale kahle kule sizini sibambana neHungry Lions ekuhambeni. Nginabadlali abahle, abazimisele ngokulwela ibheji lekilabhu," esho.

Le kilabhu ibuye yaqinisa ithimba labaqeqeshi ngokulanda uMxolisi Macuphu, kanti kukhona noKing Ndlovu ocija onozinti bale kilabhu.

* Kuzo ezeMFC, iHope FC iboleke uNaledi Hlongwane noPheko Phago kwiKaizer Chiefs.

 Isiyonke imidlalo yeMFC engempelasonto imi kanje:
NGOLWESIHLANU
EMalamulele: Gomora United vs Venda FC 15h00.
ENelson Mandela University: Highbury FC vs Hope FC 15h00.
E-Olympia Park: Orbit College vs Hungry Lions 19h30.
NGOMGQIBELO
EDobsonville Stadium: Lerumo Lions vs North West University 15h00.
ESeshego Stadium: Magesi FC vs The Bees 15h00.
E-Absa Tuks: University of Pretoria vs Midlands Wanderers 15h00.
EMxolisi Dicky: Upington City vs Real Natives 15h00.
E-Athlone Stadium: Cape Town City vs Leicesterford City 17h30.